महापालिकेच्या विविध शाळांमध्ये शाळेच्या पहिल्या दिवशी महापौर,आयुक्त यांचे समवेत महापालिकेचे अधिकारी करणार विद्यार्थ्यांचे स्वागत; पाठ्यपुस्तकांचे वाटपही होणार
पिंपरी, दि. १३ जून २०२६: उन्हाळ्याच्या सुट्टीनंतर पिंपरी-चिंचवड महानगरपालिकेच्या शिक्षण विभागांतर्गत येणाऱ्या सर्व शाळा सोमवार, दि. १५ जून २०२६ पासून पुन्हा सुरू होणार असून नवीन शैक्षणिक वर्षाच्या प्रारंभी विद्यार्थ्यांचे उत्साहपूर्ण वातावरणामध्ये स्वागत करण्यासाठी विशेष तयारी करण्यात आली आहे. विशेषतः इयत्ता पहिलीत प्रवेश घेणाऱ्या विद्यार्थ्यांसाठी पहिल्याच दिवशी सर्व महापालिका शाळांमध्ये ‘शाळा प्रवेश उत्सव’ मोठ्या उत्साहात साजरा करण्यात येणार आहे.
शाळा प्रवेश उत्सवाच्या निमित्ताने महापौर रवि लांडगे,आयुक्त डाॅ.विजय सुर्यवंशी यांच्यासह पदाधिकारी,नगरसदस्य अतिरिक्त आयुक्त, उपायुक्त विविध शाळांना भेट देऊन विद्यार्थ्यांचे स्वागत करणार आहेत. यावेळी विद्यार्थ्यांच्या शैक्षणिक प्रवासाची उत्साहपूर्ण सुरुवात व्हावी यासाठी ते पालकांशी संवाद साधण्यात येणार आहे.
या प्रवेश उत्सवाद्वारे नव्याने शाळेत दाखल होणाऱ्या विद्यार्थ्यांचे स्वागत आकर्षक पद्धतीने करण्यात येणार असून शाळेच्या पहिल्याच दिवशी विद्यार्थ्यांना आनंददायी आणि प्रेरणादायी वातावरण मिळावे, यासाठी अतिरिक्त आयुक्त विक्रांत बगाडे यांच्या मार्गदर्शनाखाली आणि उप आयुक्त ममता शिंदे यांच्या अधिपत्याखाली विविध उपक्रमांचे आयोजन करण्यात आले आहे. यामध्ये विद्यार्थ्यांचे औक्षण, स्वागत, पुष्पगुच्छ देऊन अभिनंदन तसेच शैक्षणिक साहित्याच्या माध्यमातून स्वागत करण्यात येणार आहे.
तसेच, शाळेच्या पहिल्याच दिवशी विद्यार्थ्यांना बालभारतीची मोफत पाठ्यपुस्तके वितरित करण्यात येणार असून नवीन शैक्षणिक वर्षाच्या अभ्यासक्रमाची सुरुवात तत्काळ होण्यासाठी आवश्यक शैक्षणिक साहित्य उपलब्ध करून देण्यात येणार आहे.
नवीन शैक्षणिक वर्ष सुरळीतपणे सुरू होण्यासाठी शिक्षण विभागामार्फत शाळा पूर्वतयारीची सर्व कामे पूर्ण करण्यात आली आहेत. शाळा परिसराची स्वच्छता, वर्गखोल्यांची तयारी, पिण्याच्या पाण्याची व्यवस्था, बसण्याची सुविधा, डिजिटल शिक्षण साहित्य, शैक्षणिक साधनसामग्री तसेच शिक्षकांची उपस्थिती याबाबत आवश्यक नियोजन पूर्ण करण्यात आले आहे. विद्यार्थ्यांना सुरक्षित, आनंददायी व गुणवत्तापूर्ण शैक्षणिक वातावरण उपलब्ध करून देण्यासाठी प्रशासन सज्ज झाले आहे.
कोट
शिक्षण हा प्रत्येक विद्यार्थ्याच्या भविष्यासाठी भक्कम पाया असतो आणि त्या पायाची मजबूत सुरुवात शाळेच्या पहिल्या दिवसापासून होते. पिंपरी-चिंचवड महानगरपालिकेच्या शाळांमध्ये विद्यार्थ्यांना आनंददायी, प्रेरणादायी आणि संस्कारक्षम वातावरण उपलब्ध करून देण्यासाठी विविध उपक्रम राबविण्यात येत आहेत. ‘शाळा प्रवेश उत्सवा’च्या माध्यमातून नव्याने प्रवेश घेणाऱ्या विद्यार्थ्यांचे आत्मीयतेने स्वागत करण्यात येणार असून लोकप्रतिनिधी व प्रशासन विद्यार्थ्यांच्या या नवीन प्रवासात सहभागी होणार आहेत. शहरातील पालकांनी आपल्या पाल्यांना महापालिकेच्या शाळांमध्ये प्रवेश देऊन या उपक्रमात सहभागी व्हावे.
– रवि लांडगे, महापौर, पिंपरी चिंचवड महानगरपालिका
कोट
महापालिकेच्या शाळा गुणवत्तापूर्ण शिक्षण, आधुनिक सुविधा आणि विद्यार्थीकेंद्रित उपक्रमांमुळे पालकांच्या पसंतीस उतरू लागल्या आहेत. नवीन शैक्षणिक वर्षाच्या प्रारंभी आयोजित करण्यात आलेला ‘प्रवेश उत्सव’ हा विद्यार्थ्यांच्या शैक्षणिक प्रवासाची आनंददायी सुरुवात ठरणार आहे. शहरातील सर्व पालकांनी आपल्या मुलांना महापालिकेच्या शाळांमध्ये प्रवेश देऊन पहिल्याच दिवशी शाळेत उपस्थित राहावे. विद्यार्थ्यांचे स्वागत करण्यासाठी लोकप्रतिनिधी व प्रशासन एकत्रितपणे उपस्थित राहणार आहे.
– डॉ. विजय सूर्यवंशी, आयुक्त, पिंपरी चिंचवड महानगरपालिका
