पुणे, दि. 18 : समाज कल्याण प्रादेशिक उपआयुक्त, वंदना कोचुरे यांच्या हस्ते सामाजिक न्याय भवन, विश्रांतवाडी रोड, येरवडा येथे ‘नशा मुक्त भारत अभियान, विकसित भारत की पहचान’ या जनजागृती कार्यक्रमाचा शुभारंभ करण्यात आला.
प्रादेशिक उपआयुक्त आणि सहायक आयुक्त कार्यालय समाज कल्याण यांच्या संयुक्त विद्यमाने आयोजित कार्यक्रमास समाज कल्याण आयुक्तालयाच्या व्यसनमुक्ती विभागाच्या सहायक आयुक्त मीना आंबाडेकर, समाज कल्याण अधिकारी ज्ञानेश्वर जावळे, माधुरी वाघमोडे, जिल्हा परिषद समाज कल्याण निरीक्षक सागर सोनवणे, बाल कल्याण संस्थेच्या व्यवस्थापिका अपर्णा पानसे, सामाजिक कार्यकर्ते संभाजी भांगरे उपस्थित होते.
भारत सरकारच्या सामाजिक न्याय व अधिकारिता मंत्रालयामार्फत देशातील अमली पदार्थांच्या मागणी कमी करण्यासोबत अंमली पदार्थाच्या दुष्परिणामाबाबत जनजागृती करण्याकरिता ‘मादक पदार्थ सेवन प्रतिबंधात्मक राष्ट्रीय कृती योजना’ अंतर्गत विविध उपक्रम राबविण्यात येत आहेत. त्याच अनुषंगाने १५ ऑगस्ट २०२० रोजी ‘नशा मुक्त भारत अभियान’ सुरू करण्यात आले असून आता हे अभियान देशातील सर्व जिल्ह्यांमध्ये विस्तारित करण्यात आले आहे. दरवर्षी २६ जून रोजी साजऱ्या होणाऱ्या ‘आंतरराष्ट्रीय मादक पदार्थ गैरवापर आणि अवैध तस्करी विरोधी दिन’ निमित्त १७ जून ते २६ जून २०२६ या कालावधीत विविध जनजागृती कार्यक्रमांचे आयोजन करण्यात आले आहे.
कार्यक्रमात अमली पदार्थांच्या सेवनाचे दुष्परिणाम, त्यावरील प्रतिबंधात्मक उपाययोजना तसेच समाजामध्ये जागरूकता निर्माण करण्याचे महत्त्व अधोरेखित करण्यात आले. या अभियानाच्या माध्यमातून युवकांना व्यसनापासून दूर ठेवून निरोगी व सशक्त समाज घडविण्याचा संकल्प व्यक्त करण्यात आला, अशी माहिती सहायक आयुक्त विशाल लोंढे यांनी प्रसिद्धीपत्रकान्वये दिली आहे.
या कार्यक्रमांतर्गत नशामुक्ती पोस्टर स्पर्धेचे कोरेगाव पार्क येथील दि पूना स्कूल ॲण्ड होम फॉर ब्लाइंड बॉईज येथे आयोजित करण्यात आली. स्पर्धेत जिल्ह्यातील दहा दिव्यांग शाळातील सुमारे 90 विद्यार्थ्यांनी भाग घेतले. प्रख्यात चित्रकार नीरज सबनीस यांनी पोस्टर स्पर्धेचे परीक्षण करुन गुणांकन केले.
*स्पर्धेचा निकाल:*
प्रथम क्रमांक : हुसेन सय्यद, आधार मूकबधिर विद्यालय बिबेवाडी, द्वितीय क्रमांक: महाबुबी शाबादी, चिंचवड बधीर मुक विद्यालय निगडी आणि तृतीय क्रमांक: शुभम अंबाजी जाधव, बधिर मूक शिक्षण केंद्र पुणे आणि समृद्धी वैजनाथ मिसाळ, चिंचवड बधीर मूक विद्यालय निगडी पुणे यांना विभागून देण्यात आला आहे.
0000
