*आर्थिकदृष्ट्या दुर्बल कुटुंबांतील बालरुग्णांना तज्ज्ञ डॉक्टरांचा सल्ला, औषधे, केमोथेरपी व रेडिएशन थेरपी पूर्णपणे विनामूल्य*
पुणे, दि. ३ जुलै : समाजातील आर्थिकदृष्ट्या दुर्बल आणि गरजू कुटुंबांतील बालकांना कर्करोगासारख्या गंभीर आजारावर वेळेवर, दर्जेदार आणि सर्वसमावेशक उपचार मिळावेत, या सामाजिक बांधिलकीच्या भावनेतून भवानी पेठ, पुणे येथील विश्रांती हॉस्पिटलने बालकांच्या कर्करोगासाठी विशेष निःशुल्क उपचार सहाय्य योजना सुरू केली आहे. या उपक्रमामुळे आर्थिक अडचणींमुळे उपचारांपासून वंचित राहणाऱ्या अनेक बालरुग्णांना नवजीवनाची आशा मिळणार आहे.
भारतामध्ये दरवर्षी हजारो बालकांना विविध प्रकारच्या कर्करोगाचे निदान होते. योग्य वेळी निदान आणि तज्ज्ञ उपचार मिळाल्यास अनेक मुलांना पूर्णपणे बरे होण्याची संधी असते. मात्र उपचारांचा प्रचंड खर्च, औषधांचा आर्थिक बोजा आणि दीर्घकालीन उपचार प्रक्रिया यामुळे अनेक कुटुंबांना उपचार पूर्ण करणे शक्य होत नाही. ही वस्तुस्थिती लक्षात घेऊन विश्रांती हॉस्पिटलने ही लोकहिताची योजना सुरू केली आहे.
या योजनेअंतर्गत कर्करोगाचे निदान झालेल्या पात्र बालरुग्णांना अनुभवी कर्करोगतज्ज्ञ व बालरोगतज्ज्ञ डॉक्टरांचा निःशुल्क सल्ला, आवश्यक निःशुल्क औषधे, निःशुल्क केमोथेरपी, तसेच निःशुल्क रेडिएशन थेरपी उपलब्ध करून दिली जाणार आहे. आवश्यकतेनुसार उपचार प्रक्रियेदरम्यान वैद्यकीय मार्गदर्शन आणि समुपदेशनाची सुविधाही उपलब्ध करून दिली जाणार असून, रुग्ण आणि त्यांच्या कुटुंबियांना उपचाराच्या प्रत्येक टप्प्यावर आवश्यक सहकार्य दिले जाईल.
विश्रांती हॉस्पिटलने यापूर्वीही महिलांसाठी स्तनाचा कर्करोग, अंडाशयाचा कर्करोग आणि गर्भाशयमुखाच्या कर्करोगावरील निःशुल्क उपचार योजना यशस्वीपणे राबवून अनेक महिलांना जीवनदान देण्याचे कार्य केले आहे. या सेवांचा विस्तार करत आता बालकांच्या कर्करोग उपचारांचाही समावेश करण्यात आला असून, समाजातील गरजू घटकांपर्यंत दर्जेदार कर्करोग उपचार पोहोचविण्याच्या हॉस्पिटलच्या ध्येयाला अधिक बळ मिळाले आहे.
संस्थापक विश्वस्त कर्नल एन. एस. न्यायपती यांनी राज्यातील सर्व बालरोगतज्ज्ञ, कर्करोगतज्ज्ञ, कौटुंबिक डॉक्टर, शासकीय व खासगी रुग्णालये, आरोग्यसेवा संस्था, स्वयंसेवी संस्था तसेच सामाजिक कार्यकर्त्यांना आवाहन केले आहे की, आर्थिकदृष्ट्या दुर्बल बालकर्करोग रुग्णांची माहिती या योजनेपर्यंत पोहोचवावी आणि गरजू कुटुंबांना या उपचार सुविधेचा लाभ मिळवून देण्यासाठी पुढाकार घ्यावा.
तसेच, बालकांच्या कर्करोगाने ग्रस्त मुलांचे पालक, पालकप्रतिनिधी आणि नागरिकांनी या योजनेची माहिती आपल्या नातेवाईक, मित्रपरिवार, शेजारी तसेच गरजू कुटुंबांपर्यंत पोहोचवून जनजागृती करण्यासाठी सहकार्य करावे, असे आवाहन विश्रांती हॉस्पिटलतर्फे करण्यात आले आहे.
कोणतेही मूल केवळ आर्थिक अडचणीमुळे कर्करोगावरील उपचारांपासून वंचित राहू नये, हा या उपक्रमामागील मुख्य उद्देश असून, प्रत्येक बालकाला जगण्याची समान संधी मिळावी, या सामाजिक जबाबदारीतून ही योजना सुरू करण्यात आली आहे. समाजातील सर्व घटकांच्या सहकार्यामुळे अधिकाधिक बालरुग्णांना या योजनेचा लाभ मिळेल, असा विश्वास हॉस्पिटल प्रशासनाने व्यक्त केला आहे.
अधिक माहितीसाठी संपर्क : विश्रांती हॉस्पिटल, भवानी पेठ, पुणे 📞 77700 08249 / 73500 10595
