पिंपरी, दि. ९ जून २०२६: फुगेवाडी विषारी दारू प्रकरणात बाधित तीनही रुग्णांची प्रकृती आता पूर्णपणे सुधारली असून त्यांना आज यशवंतराव चव्हाण स्मृती (वायसीएम) रुग्णालयातून डिस्चार्ज देण्यात आला. महापालिका आयुक्त डॉ. विजय सूर्यवंशी यांच्या निर्देशानुसार या सर्व रुग्णांवर संपूर्णपणे मोफत उपचार करण्यात आले.
विषारी दारू सेवनामुळे गंभीर स्थितीत रुग्णांना वायसीएम रुग्णालयात दाखल करण्यात आले होते. रुग्णालयात दाखल होताच तज्ज्ञ डॉक्टरांच्या मार्गदर्शनाखाली उपचार सुरू करण्यात आले. तसेच आवश्यक वैद्यकीय चाचण्या, औषधोपचार आणि विशेष निगा पुरविण्यात आली. रुग्णांच्या नातेवाईकांनाही वेळोवेळी आवश्यक ते सहकार्य व मार्गदर्शन करण्यात आले. तज्ज्ञ डॉक्टर, प्रशिक्षित वैद्यकीय कर्मचारी आणि आवश्यक औषधोपचार यांच्या मदतीने रुग्णांच्या प्रकृतीत लक्षणीय सुधारणा झाली.
सदर रुग्णांच्या उपचार प्रक्रियेत वायसीएम रुग्णालयाच्या मेडिसिन विभागाने अत्यंत महत्त्वपूर्ण भूमिका बजावली. विभागातील अनुभवी डॉक्टरांनी रुग्णांच्या प्रकृतीवर बारकाईने लक्ष ठेवत आवश्यक उपचार पद्धतींचा अवलंब केला. ज्यामुळे आता सर्व रुग्णांची प्रकृती स्थिर झाली असून ते पूर्णपणे बरे होऊन निरोगी अवस्थेत घरी परतत आहेत.
महापालिका प्रशासनाच्या तत्परतेमुळे आणि वायसीएम रुग्णालयातील वैद्यकीय यंत्रणेच्या समन्वित प्रयत्नांमुळे रुग्णांना वेळेत उपचार मिळाल्याने त्यांचे प्राण वाचविणे शक्य झाले. यामुळे पुन्हा एकदा वायसीएम रुग्णालयाची आपत्कालीन आरोग्य सेवा आणि तज्ज्ञ वैद्यकीय कर्मचाऱ्यांची क्षमता अधोरेखित झाली आहे.
सदर रुग्णांच्या तब्येतीत सुधारणा आणण्यासाठी आरोग्य वैद्यकीय अधिकारी डॉ. लक्ष्मण गोफणे, वायसीएम रुग्णालयाचे अधिष्ठाता डॉ. राजेंद्र वाबळे, अति. आरोग्य वैद्यकीय अधिकारी डॉ. अभयचंद्र दादेवार, वैद्यकीय अधीक्षक डॉ. उज्ज्वला अंदूरकर, ज्येष्ठ वैद्यकीय अधिकारी डॉ. शैलजा भावसार, मेडिसिन विभागाचे प्रमुख डॉ. प्रवीण सोनी तसेच डॉ. राहुल गायकवाड, डॉ. राम मुंढे आणि डॉ. नम्रता करकनाळे यांनी विशेष परिश्रम घेत महत्त्वपूर्ण भूमिका बजावली व रुग्णांच्या उपचारादरम्यान कोणतीही कमतरता राहू नये याची काळजी घेतली.
……
कोट:
विषारी दारू प्रकरणातील बाधित रुग्णांना तातडीने आणि सर्वोत्तम उपचार मिळावेत यासाठी महापालिकेने आवश्यक त्या सर्व सुविधा मोफत उपलब्ध करून दिल्या. सर्व रुग्णांची प्रकृती सुधारून त्यांना घरी जाता येत आहे, ही समाधानाची बाब आहे. वायसीएम रुग्णालयातील डॉक्टर, परिचारिका आणि वैद्यकीय कर्मचाऱ्यांनी केलेले कार्य कौतुकास्पद आहे.
– डॉ. विजय सूर्यवंशी, आयुक्त, पिंपरी चिंचवड महानगरपालिका.
………
कोट:
विषारी दारू प्रकरणातील रुग्णांची स्थिती लक्षात घेऊन त्यांच्यावर तातडीने आणि नियोजनबद्ध पद्धतीने उपचार करण्यात आले. विविध विभागांतील तज्ज्ञ डॉक्टरांनी समन्वयाने काम करत रुग्णांच्या प्रकृतीवर सातत्याने लक्ष ठेवले. वैद्यकीय विभागाच्या तज्ज्ञ डॉक्टरांनी आपत्कालीन परिस्थितीत वेळेवर केलेल्या उपचारांमुळे सर्व रुग्णांची प्रकृती पूर्णपणे सुधारणे शक्य झाले.
– डॉ. लक्ष्मण गोफणे, आरोग्य वैद्यकीय अधिकारी, पिंपरी चिंचवड महानगरपालिका.
……..
कोट:
आपत्कालीन परिस्थिती तज्ज्ञ डॉक्टरांनी आणि वैद्यकीय कर्मचाऱ्यांनी रुग्णांवर अत्यंत दक्षतेने उपचार केले. रुग्णांची प्रकृती सुधारण्यासाठी आवश्यक असलेल्या सर्व तपासण्या, औषधोपचार आणि सुविधा वायसीएम रुग्णालयामार्फत वेळेत व मोफत उपलब्ध करून देण्यात आल्या.
– डॉ. अभयचंद्र दादेवार
, अति. आरोग्य वैद्यकीय अधिकारी, पिंपरी चिंचवड महानगरपालिका.
