पुणे, दि. २६: अहिल्यानगर येथे पार पडलेल्या महाराष्ट्र राज्य तायक्वांदो अजिंक्यपद स्पर्धेत नांदे येथील ध्रुव ग्लोबल स्कूलच्या अंश सिंह याने दणदणीत कामगिरी करत अंडर-६१ किलो वजनी गटात सुवर्णपदकावर आपले नाव कोरले. अंतिम सामन्यात 3-0 आणि 5-0 अशा एकतर्फी व दणदणीत विजयासह त्याने महाराष्ट्र राज्य विजेता होण्याचा बहुमान मिळवला. या सोनेरी यशामुळे त्याची सिक्कीम येथे होणाऱ्या आगामी राष्ट्रीय तायक्वांदो अजिंक्यपद स्पर्धेसाठी महाराष्ट्र संघात निवड झाली आहे.
ध्रुव ग्लोबल स्कूलमध्ये इयत्ता ९ वी (ब ) मध्ये शिकणाऱ्या अंशने या स्पर्धेत सुरुवाती पासूनच आपले वर्चस्व राखले. प्रत्येक फेरीत प्रतिस्पर्ध्यांवर तांत्रिक व रणनीतिकदृष्ट्या मात करत त्याने अंतिम फेरीपर्यंत सातत्यपूर्ण यश संपादन केले. त्याच्या या कामगिरीमुळे ध्रुव ग्लोबल स्कूलच्या शिरपेचात मानाचा तुरा रोवला गेला आहे.
अंशच्या या यशामागे राष्ट्रीय सुवर्णपदक विजेत्या व शिवछत्रपती राज्य क्रीडा पुरस्कारप्राप्त प्रशिक्षिका कोमल पाठारे-घारे यांचे मोलाचे व प्रेरणादायी मार्गदर्शन लाभले आहे. त्यांच्या शिस्तबद्ध सरावामुळेच हे यश शक्य झाल्याचे सांगण्यात येत आहे.
अंशच्या या दैदिप्यमान यशाबद्दल ध्रुव ग्लोबल स्कूलचे विश्वस्त व संचालक यशवर्धन मालपाणी आणि प्राचार्य संगीता राऊतजी यांनी त्याचे विशेष कौतुक केले. तसेच सिक्कीम येथे होणाऱ्या राष्ट्रीय स्पर्धेतही त्याने अशीच यशोशिखरे गाठावीत, अशा हार्दिक शुभेच्छा त्यांनी दिल्या.
