पुणे, १५ सप्टेंबर: भारतीय फोर्जिंग क्षेत्रातील सर्वोच्च संस्था, असोसिएशन ऑफ इंडियन फोर्जिंग इंडस्ट्री (AIFI) ने “न्यू डेव्हलपमेंट ट्रेंड्स – इम्पॅक्ट ऑन फोर्जिंग इंडस्ट्री” या संकल्पनेवर आपल्या दुसऱ्या वार्षिक परिषदेचे यशस्वी आयोजन केले. या परिषदेत उद्योग क्षेत्रातील आघाडीच्या भागधारकांनी बदलत्या व्यावसायिक वातावरणावर तसेच भारतीय फोर्जिंग उद्योगाचे भविष्य घडवणाऱ्या संधी आणि आव्हानांवर सखोल चर्चा केली. या परिषदेत बदलती जागतिक पुरवठा साखळी, नव्याने उदयास येणारी ‘चायना प्लस वन’ संधी, तंत्रज्ञान आणि ऑटोमेशन, उत्पादकता, मनुष्यबळ, वाढता कच्चा माल खर्च (इनपुट कॉस्ट) आणि संपूर्ण क्षेत्रात अधिक मजबूती व स्पर्धात्मकतेची आवश्यकता या मुद्द्यांवर लक्ष केंद्रित करण्यात आले.
परिषदेतील चर्चेतून हे स्पष्ट झाले की भारतीय फोर्जिंग उद्योग एका महत्त्वपूर्ण टप्प्यावर उभा आहे. जागतिक कंपन्या त्यांच्या पुरवठा साखळीत वैविध्य आणण्याचा प्रयत्न करत असल्याने भारतीय कंपन्यांसाठी जागतिक मूल्य साखळीत आपले स्थान मजबूत करण्याची ही एक मोठी संधी आहे. तथापि, तंत्रज्ञान, ऑटोमेशन, अभियांत्रिकी, संशोधन आणि विकास (R&D) क्षमता, कुशल मनुष्यबळ, उत्पादकता आणि शाश्वतता यामध्ये गुंतवणूक करून या उद्योगाला पारंपारिक उत्पादन आणि पुरवठादार मॉडेलच्या पलीकडे जावे लागेल. भारताकडे पसंतीचा जागतिक भागीदार होण्यासाठी उत्पादन पायाभूत सुविधा, अभियांत्रिकी गुणवत्ता आणि बाजारातील संधी उपलब्ध आहेत; मात्र पुढील टप्प्यातील वाढीचा फायदा घेण्यासाठी फोर्जिंग कंपन्यांनी अधिक जबाबदारी स्वीकारणे, अनिश्चिततेचे व्यवस्थापन करणे, ग्राहकांच्या वाढत्या अपेक्षा पूर्ण करणे आणि उच्च दर्जाची उत्पादने व सेवा देण्याची क्षमता निर्माण करणे आवश्यक आहे, हा स्पष्ट संदेश या परिषदेतून देण्यात आला.
उपस्थितांना संबोधित करताना AIFI चे अध्यक्ष आणि वर्षा फोर्जिंग्स प्रायव्हेट लिमिटेडचे सीईओ श्री. यश मुनोट म्हणाले, “भारतीय फोर्जिंग उद्योग एका अत्यंत महत्त्वाच्या वळणावर असून जागतिक पुरवठा साखळीतील पुनर्रचनेमुळे भारतासाठी मोठ्या संधी निर्माण होत आहेत. त्याच वेळी भू-राजकीय अनिश्चितता, कच्च्या मालाचा वाढता खर्च, तांत्रिक बदल आणि ग्राहकांच्या बदलत्या गरजांचा सामना करण्यासाठी आपण सदैव सज्ज राहिले पाहिजे. आपले संपूर्ण लक्ष उत्पादकता वाढवणे, तंत्रज्ञानाचा वेगवान अवलंब करणे, मनुष्यबळ विकास आणि नवोपक्रम (इनोव्हेशन) तसेच शाश्वतता अधिक बळकट करण्यावर असले पाहिजे. भारतीय फोर्जिंग उद्योगासमोर मोठी संधी आहे, पण जागतिक ग्राहकांसाठी अधिक मजबूत आणि विश्वासू भागीदार बनण्यासाठी आपल्याला आवश्यक क्षमता आणि स्पर्धात्मकता निर्माण करावी लागेल.”
या परिषदेचे मुख्य अतिथी, बीएमडब्ल्यू ग्रुप प्लांट चेन्नईचे व्यवस्थापकीय संचालक (MD) श्री. थॉमस डोज़ यांनी ‘चायना प्लस वन’ धोरणाच्या पार्श्वभूमीवर भारताच्या वाढत्या जागतिक महत्त्वाबद्दल माहिती दिली. त्यांनी नमूद केले की, भू-राजकीय घडामोडी आणि एकाच पुरवठादारावर अवलंबून राहण्यातील जोखमींमुळे जागतिक कंपन्या आता आपल्या पुरवठा साखळीचे विकेंद्रीकरण करत आहेत. दर्जेदार अभियांत्रिकी गुणवत्ता, मोठी देशांतर्गत बाजारपेठ आणि सक्षम फोर्जिंग परिसंस्थेच्या (इकोसिस्टम) बळावर भारताला पसंतीचे ‘प्लस वन’ केंद्र म्हणून उदयास येण्याची मोठी संधी आहे. श्री. डोज़ यांनी अधोरेखित केले की, ही संधी केवळ उत्पादन आणि सोर्सिंगपुरती मर्यादित नसून, जागतिक ग्राहक आता अशा पुरवठादारांच्या शोधात आहेत जे अभियांत्रिकी आणि विकास क्षमतांमध्ये मोठे योगदान देऊ शकतील आणि सुरुवातीपासून शेवटपर्यंत संपूर्ण जबाबदारी स्वीकारू शकतील.
श्री. थॉमस डोज़ म्हणाले, “भारताने ‘प्लस वन’ व्हावे, असा आमचा ठाम विश्वास आहे. भारताकडे उत्तम अभियांत्रिकी बुद्धिमत्ता, मोठी बाजारपेठ आणि अत्यंत सक्षम फोर्जिंग उद्योग आहे. परंतु ‘चायना प्लस वन’ म्हणजे केवळ उत्पादनांचा पुरवठा करणे एवढेच नाही; आम्हाला भारताकडून व्यापक सहकार्याची अपेक्षा आहे. ग्राहक अशा सक्षम भागीदारांच्या शोधात आहेत जे जबाबदारी घेऊ शकतील, अभियांत्रिकी आणि संशोधनात योगदान देतील आणि उत्पादन विकास प्रक्रियेचा भाग बनतील. भारत आता केवळ पुरवठा साखळी राहिलेला नसून, भारतीय कंपन्यांनी आमच्या विकासाचा भाग बनणे गरजेचे आहे. अस्तित्वात असलेल्या क्षमतांना एकत्र जोडणे हे सध्याचे मोठे आव्हान असून यामध्ये AIFI ची भूमिका अतिशय महत्त्वाची ठरेल.”
या परिषदेत AIFI च्या पश्चिम विभागाचे अध्यक्ष आणि एस. बी. फोर्जटेक प्रायव्हेट लिमिटेडचे सीईओ श्री. सुनील जावलेकर यांनी स्वागतपर भाषण केले. पीडब्ल्यूसी (PwC) चे कार्यकारी संचालक श्री. योगेश ठाकर यांनी “इंडियन फोर्जिंग इंडस्ट्री – नेक्स्ट ग्लोबल एज” या विषयावर सादरीकरण करून भारतीय कंपन्यांना जागतिक उत्पादन परिसंस्थेत स्वतःला मजबूत करण्याच्या संधींवर प्रकाश टाकला. या कार्यक्रमास AIFI व्यवस्थापकीय समितीचे सदस्य, उद्योजक आणि प्रतिनिधी मोठ्या संख्येने उपस्थित होते. स्मृतिचिन्ह वितरण आणि आभारप्रदर्शन AIFI चे उपाध्यक्ष आणि सुपर ऑटो फोर्ज प्रायव्हेट लिमिटेडचे व्यवस्थापकीय संचालक श्री. एस. रविशंकर यांनी केले.
या परिषदेत “मॅनेजिंग अनसर्टेनिटी / चॅलेंजेस टू कॅपिटलाइज ऑन डिमांड सर्ज” या विषयावर एका विशेष चर्चासत्राचे (पॅनेल डिस्कशन) आयोजन करण्यात आले होते. याचे संचालन श्री. एस. रविशंकर यांनी केले. या पॅनेलमध्ये एम.एम. फोर्जिंग्स लिमिटेडचे सीएमडी श्री. विद्याशंकर कृष्णन, बजाज मोटर्स लिमिटेडचे एमडी श्री. विकास बजाज आणि हर्शव्होगेल कंपोनंट्स इंडिया प्रायव्हेट लिमिटेडचे सीईओ श्री. साहिल जैन यांचा समावेश होता. या चर्चेत भविष्यातील वाढती मागणी आणि ती पूर्ण करण्यासाठी उद्योगाची तयारी यावर विचारमंथन झाले. यामध्ये जीएसटी, मनुष्यबळाची उपलब्धता, ऑटोमेशन, तंत्रज्ञान अपग्रेडेशन, गुंतवणूक, प्रशिक्षण, आकस्मिक योजना (कन्टिन्जन्सी प्लॅनिंग), संशोधन व विकास (R&D), उत्पादकता, मागणी व्यवस्थापन आणि कच्च्या मालाचे वाढते दर यांसारख्या मुद्द्यांवर सविस्तर चर्चा झाली. अनिश्चिततेवर मात करून वाढत्या मागणीचे शाश्वत विकासात रूपांतर करण्यासाठी तंत्रज्ञान, ऑटोमेशन, कौशल्य आणि संशोधनात सक्रिय गुंतवणुकीसह उच्च उत्पादकता आणि मजबूत नियोजन आवश्यक असल्याचे पॅनेल सदस्यांनी स्पष्ट केले.
जागतिक कंपन्या जेव्हा आपले सोर्सिंग आणि उत्पादन केंद्र विस्तारत आहेत, तेव्हा भारतीय फोर्जिंग उद्योगासाठी अफाट संधी उपलब्ध असल्याचे या परिषदेतून अधोरेखित झाले. उद्योगाला आपल्या सध्याच्या उत्पादन क्षमतेचा पूर्ण वापर करत तंत्रज्ञान, अभियांत्रिकी, कौशल्य आणि नवोपक्रमात गुंतवणूक करावी लागेल, जेणेकरून जागतिक मूल्य साखळीत उच्च स्थान गाठता येईल आणि जागतिक ग्राहकांसोबत दीर्घकालीन भागीदारी प्रस्थापित करता येईल.
भारतीय फोर्जिंग उद्योगाची स्पर्धात्मकता अधिक मजबूत करणे आणि देशांतर्गत तसेच जागतिक बाजारपेठेत भारतीय कंपन्यांसाठी नवीन संधी निर्माण करण्याच्या संकल्पासह परिषदेची सांगता झाली. उद्योगातील सर्व घटकांना एकाच व्यासपीठावर आणणे, ज्ञानाची देवाणघेवाण सुलभ करणे आणि फोर्जिंग क्षेत्राच्या हिताचे प्रतिनिधित्व करणे यात AIFI आपली महत्त्वाची भूमिका सातत्याने बजाव
त आहे.
