पुणे, दि.७: पुणे प्रादेशिक परिवहन कार्यालय येथे लवकरच दुचाकी वाहनांसाठी नवीन मालिका सुरु करण्यात येत आहे. या मालिकेतील आकर्षक नोंदणी क्रमांक तीनपट शुल्क भरून खासगी चारचाकी वाहनांसाठी राखून ठेवण्यासाठी तसेच उर्वरित क्रमांकाबाबत दुचाकींसाठी आगाऊ अर्ज स्वीकारण्याची व लिलाव कार्यपद्धतीची प्रक्रिया सुरू करण्यात आली आहे.
नव्याने सुरु होणाऱ्या दुचाकी मालिकेतील आकर्षक तसेच पसंतीचे क्रमांक चारचाकींसाठी हवे असलेल्या वाहन मालकांकडून एकाच क्रमांकाकरीता एकापेक्षा जास्त अर्ज आल्यास त्याची यादी कार्यालयाच्या सूचना फलकावर प्रसिद्ध करण्यात येईल. त्यांच्याकडून लिलावाचे धनाकर्ष (डीडी) ८ ऑगस्ट रोजी दुपारी २.३० वाजेपर्यंत स्वीकारले जातील. त्याच दिवशी दुपारी ४ वाजता सहकार सभागृहामध्ये लिलाव करण्यात येईल.
दुचाकी वाहन मालकांनी आकर्षक तसेच पसंतीचे क्रमांक विहित शुल्क भरून हवे असल्यास ८ ऑगस्ट रोजी सकाळी १०.३० ते दुपारी २.३० वाजेपर्यंत अर्ज करावा. एकाच क्रमांकाकरीता एकापेक्षा जास्त अर्ज असल्यास त्याची यादी कार्यालयाच्या सूचना फलकावर प्रसिद्ध करण्यात येईल. लिलावाचे डीडी ९ ऑगस्ट रोजी दुपारी २.३० वाजेपर्यंत स्वीकारले जातील. प्राप्त अर्जांचा लिलाव त्याच दिवशी दुपारी ४ वाजता सहकार सभागृहामध्ये करण्यात येईल.
अर्ज कार्यालयाच्या खासगी वाहन नोंदणी विभागात डीडी, पत्त्याचा पुरावा, आधारकार्ड, ओळखपत्र, पॅनकार्डच्या साक्षांकित प्रतीसह आधार कार्डला लिंक असलेल्या मोबाईल क्रमांकासह जमा करावा. हा डीडी ‘आर.टी.ओ.,पुणे’ यांच्या नावे राष्ट्रीयकृत, अनुसूचित बँकेचा पुणे येथील असावा. लिलाव प्रक्रियेत एका क्रमांकाला समान रकमेचे डीडी प्राप्त झाल्यास असा क्रमांक अर्जदारांच्या नावाच्या चिठ्ठ्या टाकून निश्चित करण्यात येईल.
नोंदणी क्रमांक राखून ठेवलेल्या दिनांकापासून ३० दिवसांच्या आत वाहनाच्या नोंदणीची प्रक्रिया पूर्ण न झाल्यास पसंती क्रमांकाची वैधता संपुष्टात येते.
परंतु, आता एनआयसी संकेतस्थळामार्फत या प्रक्रियेमध्ये बदल झाला असून वैधता संपलेले पसंती क्रमांक हे नागरिकांना पसंती क्रमांकाच्या संकेतस्थळावर उपलब्ध असल्याचे दिसतात. सहायक रोखपाल यांच्याकडे ‘प्रथम येणाऱ्यास प्रथम प्राधान्य’ या तत्वानुसार अर्ज करणाऱ्या इतर कोणत्याही व्यक्तीला पसंती क्रमांक जारी करण्यात येत आहे.
प्रादेशिक परिवहन कार्यालय पुणेच्या कार्यक्षेत्रातील वाहनधारकांनीच अर्ज सादर करावेत, कार्यक्षेत्राबाहेरील अर्ज, चुकीच्या रकमेचा डीडी जोडलेले तसेच अचूक मोबाईल क्रमांक न लिहिलेले अर्ज बाद ठरविण्यात येतील. वरील कालावधीमध्ये व पुढे त्यावेळी अस्तित्वात असलेले शुल्क लागू राहणार असल्याचे सहायक प्रादेशिक परिवहन अधिकारी, पुणे यांनी कळविले आहे.
0000
