🚩भारताला बौद्धिक छात्रधर्म जागविणाऱ्या शिवरायांची गरज स्वामी गोविंददेव गिरीजी महाराज; ‘भारत ः सत्य, सत्व, स्वत्व’ पुस्तकाचे प्रकाशन 🚩

♦️पुणे, दिनांक २८ मे मानवजातीला सुखी ठेवायचे असेल तर भारताचा धर्मविचार टिकायला हवा. छत्रपती शिवाजी महाराजांनी याच संस्कृतीच्या संरक्षणासाठी हिंदवी स्वराज्याची निर्मिती केली. आज राष्ट्र रक्षणासाठी बौद्धिक छात्रधर्म जागविणाऱ्या शिवरायांची गरज आहे, असे प्रतिपादन श्रीराम जन्मभूमी तीर्थक्षेत्र न्यासाचे कोषाध्यक्ष स्वामी गोविंददेव गिरीजी महाराज यांनी केले.

♦️अभिजित जोग लिखित ‘भारत ः सत्य, सत्व, स्वत्व’ या पुस्तक प्रकाशन कार्यक्रमात ते बोलत होते. पुण्यातील गोखले इन्स्टिट्यूटच्या काळे सभागृहात आयोजित या कार्यक्रमाला संशोधक व लेखक नीलेश ओक, भाजपचे माजी राष्ट्रीय उपाध्यक्ष श्याम जाजू, राष्ट्रीय स्वयंसेवक संघाचे अखिल भारतीय धर्मजागरण प्रमुख शरद ढोले, लेखक अभिजित जोग आदि उपस्थित होते. भारताला स्वत्वाची जाणिव होण्याची आवश्यकता गोविंददेव गिरीजी यांनी व्यक्त केली. ते म्हणाले, “गेली २०० वर्षे आपल्या स्मृती पुसून टाकण्याचे प्रयोग झाले. त्यामुळे आपली ओळख नक्की कोणती, हा प्रश्न ऐरणीवर येतो. त्यामुळे आज सत्यान्वेशी लोकांचा शोध घेण्याची आवश्यकता आली आहे. नाहीतर काल परवा जे बांगलादेशात घडले, पश्चिम बंगालमध्ये जे नमुना म्हणून घडतेय ते पुण्यात घडायला वेळ लागणार नाही. त्यासाठी आपल्यातील शिवचैतन्य जागृत करण्याची आवश्यकता आहे.”

♦️सहिष्णूता आणि सर्वसमावेशकता हे भारताचे अविभाज्य अंग आहे. त्याच्या पुनर्निर्माणाची संधी आली तेंव्हा आपण करंटे ठरलो, असे मत श्याम जाजू यांनी मांडले. तर इंडियाला भारत समजून घ्यायचा असेल तर हे पुस्तक उत्तम असल्याचे मत ढोले यांनी व्यक्त केले. ते म्हणाले, “आपली भाषा, ज्ञान, विचार, संस्कृती याची ज्याला विस्मृती झाली आहे असे लोक इंडियात राहतात. आज भारतामध्ये इंडिया आणि भारत असे दोन्ही विचारप्रवाह राहतात. भारताला आपला वैचारिक लढा देण्यासाठी हे पुस्तक महत्त्वपूर्ण ठरेल.” नीलेश ओक यांनी पुस्तकाचे महत्त्व स्पष्ट केले. या पुस्तकातून प्रत्येकाने एक कृती आत्मसात करावी, असे आवाहन त्यांनी केले.

♦️पुस्तकाचे लेखक म्हणून मनोगत व्यक्त करताना जोग म्हणाले, ”ओळख हरवलेल्या राष्ट्राचे अस्तित्व संपते. स्मृतीभ्रंश झालेल्या राष्ट्रावर इतरांची ओळख लादू शकते. दुर्दैवाने भारताच्या बाबतीत हेच घडले. ब्रिटीशांनी राष्ट्र म्हणून भारताचे अस्तित्व नाकारले होते, मात्र ऋग्वेद काळापासून भारत एक राष्ट्र आहे. भारताच्या खऱ्या ओळखीचा शोध घेणारे हे पुस्तक आहे.”
सूत्रसंचालन मधुमिता बर्वे यांनी केले. दिलिपराज प्रकाशनाचे प्रमुख मधुर बर्वे यांनी प्रास्ताविक केले.