*पुणे* : रामकृष्ण अण्णा सातव पाटील आयोजित ६८ वी वरिष्ठ महाराष्ट्र राज्य अजिंक्यपद व महाराष्ट्र केसरी किताब कुस्ती स्पर्धा २०२६ मध्ये माती विभागात सोलापूरच्या मल्लांनी विशेष छाप पाडली, तर गादी विभागात कोल्हापूरच्या मल्लांनी आपली दमदार पकड सिद्ध केली. वाघोली, पुणे येथे रंगलेल्या या मानाच्या स्पर्धेत राज्यभरातील नामांकित मल्लांनी आपल्या ताकदी, तंत्र आणि चुरशीच्या जोरावर कुस्तीप्रेमींचे डोळे दिपवले.
माती विभागात सोलापूरच्या मल्लांचे वर्चस्व विशेष ठरले. महाराष्ट्र केसरी गटात सोलापूरच्या महेंद्र गायकवाडने हिंगोलीच्या सिकंदर शेखवर मात करत प्रथम क्रमांक पटकावला. तसेच ८६ किलो गटात मशीद शेख आणि ९७ किलो गटात रोहन पवार यांनी सुवर्ण कामगिरी करत सोलापूरची ताकद दाखवून दिली. याशिवाय माती विभागातील १० पैकी तब्बल ५ वजनी गटांत सोलापूर जिल्ह्याच्या मल्लांनी अव्वल स्थान मिळवत संपूर्ण स्पर्धेवर आपला ठसा उमटवला. ५७ किलो गटात कोल्हापूर जिल्ह्याच्या मृणाल पाटीलनेही उल्लेखनीय कामगिरी नोंदवत पहिले स्थान मिळवले.
दुसरीकडे, गादी विभागात कोल्हापूरच्या मल्लांनी अक्षरशः मैदान गाजवले. महाराष्ट्र केसरी गटात नाशिकच्या हर्षवर्धन सदगीरने सोलापूरच्या जय पाटीलला नमवत विजेतेपद मिळवले. मात्र गादी विभागातील विविध वजनी गटांमध्ये कोल्हापूर शहराच्या मल्लांनी वर्चस्व राखले. ५७ किलो गटात अक्षय ढेरे, ६१ किलोमध्ये वैभव पाटील, ७४ किलोमध्ये आदर्श पाटील, ९२ किलोमध्ये श्रेयस गाट आणि ९७ किलोमध्ये मोहन पाटील यांनी प्रथम क्रमांक पटकावत कोल्हापूरच्या गादी विभागातील तयारीची ताकद अधोरेखित केली.
या स्पर्धेत सातारा, पुणे, बीड आणि सांगलीच्या मल्लांनीही चुरशीची लढत देत आपली छाप सोडली. ७४ किलो माती विभागात साताऱ्याच्या तेजस गोफणेने बाजी मारली, तर ७० किलो गादी विभागात बीडच्या सुमितकुमार बारस्करने विजेतेपद मिळवले.
राज्यभरातील हजारो कुस्तीप्रेमींच्या उपस्थितीत पार पडलेल्या या स्पर्धेने महाराष्ट्राच्या समृद्ध कुस्ती परंपरेचा वारसा पुन्हा एकदा दिमाखात अधोरेखित केला.
रामकृष्ण अण्णा सातव पाटील यांच्या आयोजनातून वाघोली, पुणे येथे पार पडलेल्या ६८ व्या महाराष्ट्र केसरी स्पर्धेने कुस्तीच्या मैदानात नव्या दमाच्या मल्लांना मोठे व्यासपीठ उपलब्ध करून दिले, तसेच महाराष्ट्राच्या कुस्ती संस्कृतीची ताकद पुन्हा एकदा राज्यासमोर ठळकपणे मांडली.
