पुणे : जननायक, लोकसभेतील विरोधी पक्षनेते, खा. राहुलजी गांधी यांच्या ‘छात्रों की गूंज’ कार्यक्रमाच्या जनजागृतीसाठी ज्या ऐतिहासिक भिडे वाड्यातून क्रांतीज्योती सावित्रीबाई फुले यांनी स्त्रीशिक्षणाची क्रांती सुरू केली, त्याच वास्तूपासून पुणे शहर महिला काँग्रेसच्यावतीने प्रचार रॅली काँग्रेसचे प्रदेशाध्यक्ष हर्षवर्धनजी सपकाळ यांच्या उपस्थितीत आज (रविवारी) काढण्यात आली.
शिक्षण, रोजगार, सुरक्षा, समानता आणि स्वतःचा आवाज मांडण्याचे स्वातंत्र्य हे विद्यार्थिनींचे मूलभूत प्रश्न आहेत. विद्यार्थ्यांसमोर आज अस्तित्वाचा आणि भविष्याचा प्रश्न आहे. यामुळे विद्यार्थ्यांमध्ये कमालीची अस्वस्थता आहे. सावित्रीच्या लेकी आता मात्र संघटितपणे या अन्यायाविरोधात व्यक्त होत आहेत, असे या प्रसंगी बोलताना हर्षवर्धनजी सपकाळ यांनी सांगितले.
पुण्यात सावित्रीच्या लेकींसोबत थेट संवाद राहुलजी गांधी साधणार आहेत, अशी माहिती सपकाळ यांनी दिली..
सावित्रीबाईंच्या विचारांची प्रेरणा घेऊन विद्यार्थिनींच्या हक्कांचा आणि अपेक्षांचा आवाज अधिक बुलंद करण्यासाठी हा संवाद महत्त्वाचा असल्याचे सपकाळ यांनी सांगितले.
राहुलजी गांधींसमवेत थेट संवाद साधण्यासाठी आणि विद्यार्थिनींच्या हक्कांचा हा आवाज पुण्यातून देशभर पोहोचवण्यासाठी ‘छात्रों की गूंज’ कार्यक्रमात मोठ्या संख्येने सहभागी व्हा, असे आवाहन सपकाळ यांनी यावेळी केले.
याप्रसंगी प्रदेश काँग्रेसचे वरिष्ठ उपाध्यक्ष मोहन जोशी, पुणे शहर पूर्व चे अध्यक्ष प्रशांत जगताप आणि पुणे शहर पश्चिम च्या अध्यक्षा दीप्ती चवधरी, युवक काँग्रेस चे प्रदेशाध्यक्ष शिवराज मोरे, पुणे शहर महिला काँग्रेसच्या अध्यक्षा स्वातीताई शिंदे, इंटक पुणे चे अध्यक्ष चेतन अगरवाल, सुरेश कांबळे, अलका जोशी यांच्यासह पदाधिकारी आणि असंख्य कार्यकर्ते उपस्थित होते.
