पुणे, २२ ऑक्टोबर २०२६ — दीपस्तंभ चॅरिटेबल ट्रस्टच्या ‘स्कूल संसद’ या अनोख्या शैक्षणिक उपक्रमाच्या २०२६-२७ च्या आवृत्तीची घोषणा करण्यात आली असून डिसेंबर २०२६ मध्ये महाराष्ट्रातील विविध जिल्ह्यांमध्ये प्रादेशिक प्राथमिक फेऱ्यांनी सुरू होईल.या स्पर्धेतून सर्वोत्तम १५० विद्यार्थी प्रतिनिधींची निवड केली जाईल. गेल्या १३ वर्षांपासून, हा प्रकल्प इयत्ता ८ वी आणि ९ वीच्या विद्यार्थ्यांना लोकशाही आणि संसदीय प्रणालीचा थेट व व्यावहारिक अनुभव देत आहे.
आजच्या काळात, एकीकडे राजकारण आणि प्रशासनाविषयी सर्वसामान्यांच्या मनात नकारात्मकता पसरली आहे, तर दुसरीकडे शाळांमधील नागरिकशास्त्र केवळ पाठ्यपुस्तकातील सिद्धांतापुरतेच मर्यादित राहिले आहे. ही मोठी दरी सांधण्यासाठी, ‘स्कूल संसद’ विद्यार्थ्यांना एक हक्काचे व्यासपीठ उपलब्ध करून देते, जिथे विद्यार्थी स्वतः कायदेकर्ते (खासदार/आमदार) बनून सामाजिक प्रश्नांवर चर्चा करतात आणि धोरणनिर्मितीची प्रक्रिया समजून घेतात. ही एक वक्तृत्व स्पर्धा नसून, आपल्या संविधानातील ‘न्याय, स्वातंत्र्य, समता आणि बंधुता’ या मूल्यांचे जतन करण्यासाठी समर्पित असलेली एक चळवळ आहे.
या प्रकल्पाला लेफ्टनंट जनरल डी. बी. शेकटकर, ज्येष्ठ पत्रकार श्री. सुनंदन लेले, चित्रपट निर्माते श्री. विवेक अग्निहोत्री, आरटीआय तज्ज्ञ श्री. विवेक वेलणकर, डॉ. राजेंद्र हिरेमठ आणि श्री. इंद्रजित देशमुख यांसारख्या नामांकित व आदरणीय व्यक्तिमत्त्वांचे समर्थन व कौतुक लाभले आहे.
पूर्णपणे ना-नफा तत्त्वावर चालणाऱ्या या उपक्रमात कोणताही व्यावसायिक दृष्टिकोन नाही. शाळा किंवा विद्यार्थ्यांकडून कोणतेही शुल्क आकारले जात नाही. प्रत्येकाला नेतृत्व विकासाची समान संधी मिळावी म्हणून दीपस्तंभ चॅरिटेबल ट्रस्ट या उपक्रमाचा संपूर्ण खर्च स्वतः उचलते.दीपस्तंभ चॅरिटेबल ट्रस्ट महाराष्ट्रातील सर्व शाळांना या अनोख्या उपक्रमात सहभागी होण्यासाठी सस्नेह आमंत्रण देत आहे.
