पुणे : आजच्या वेगाने प्रगती करणाऱ्या तंत्रज्ञानाच्या युगात क्रिप्टोकरन्सी अँड ब्लॉकचेन यासंदर्भात झालेला विकास, वित्तीय उद्योगावरील परिणाम आणि बदलत्या तंत्रज्ञानाच्या परिस्थितीत अकाऊंटींग क्षेत्रातील बदल या विषयावर सविस्तर भाष्य करणाऱ्या दोन पुस्तकांचा प्रकाशन सोहळा मंगळवारी (दि.१०) होणार आहे. डॉ. भाग्यश्री देशपांडे लिखित ‘वित्तीय बाजारपेठेत क्रिप्टो-करन्सी आणि ब्लॉकचेन’ आणि ‘भविष्यातील डिजिटल युगासह अकाउंटिंग’ या पुस्तकांचे प्रकाशन होणार आहे.
मंगळवारी, सकाळी ११ वाजता मुकुंद नगर मधील टिळक महाराष्ट्र विद्यापीठाच्या तिसऱ्या मजल्यावरील सेमिनार हॉलमध्ये हा कार्यक्रम होणार आहे. यावेळी टिळक महाराष्ट्र विद्यापीठाच्या विश्वस्त आणि व्यवस्थापन विभागाच्या डीन डॉ. प्रणती टिळक, देशपांडे क्लासेसचे प्रमुख प्रा. मुकुंद देशपांडे आदी मान्यवर उपस्थित राहणार आहेत. प्रकाशन सोहळ्यासह वित्त आणि लेखाशास्त्राच्या भविष्यावर विचारप्रवर्तक चर्चा देखील होईल.
‘क्रिप्टोकरन्सी अँड ब्लॉकचेन इन फायनान्शिअल मार्केट्स’ या पुस्तकाद्वारे तंत्रज्ञानाचा विकास कसा झाला आहे आणि त्यांचा वित्तीय उद्योगावर कसा परिणाम झाला आहे, याची सर्वसमावेशक समज सांगण्यात येत आहे. हे पुस्तक ब्लॉकचेन तंत्रज्ञानामागील मूलभूत संकल्पना, बिटकॉइन आणि इथेरियम सारख्या क्रिप्टोकरन्सीचा उदय आणि जागतिक वित्तपुरवठा पुन्हा आकार देण्यासाठी त्यांच्याकडे असलेल्या क्षमतेचा शोध देखील मांडत आहे.
तसेच दुसरे पुस्तक हे डिजिटल युगातील अकाउंटिंग या बदलाचा सखोल अभ्यास समोर ठेवते. आजच्या वेगाने प्रगती करणाऱ्या तंत्रज्ञानाच्या परिस्थितीत, अकाउंटिंग क्षेत्रात मोठे परिवर्तन होत आहे. डिजिटल तंत्रज्ञान अकाउंटिंग पद्धतींना कसे आकार देत आहेत आणि व्यवसाय आणि व्यावसायिकांनी नवीन डिजिटल वातावरणाशी कसे जुळवून घेतले पाहिजे यावर पुस्तकात प्रकाश टाकण्यात आला आहे. कार्यक्रम सर्वांसाठी खुला असून पुणेकरांनी मोठ्या संख्येने सहभागी व्हावे, असे आवाहन करण्यात आले आहे.
——————————————–
