पुणे : हिंदूंचे आर्थिक प्रबोधन आणि सक्षमीकरण या उद्देशाने कार्यरत असलेल्या पवित्रम् फाऊंडेशन या संस्थेने हिंदू व्यावसायिक आणि ग्राहकांना एका व्यासपीठावर आणण्यासाठी ‘पवित्रम्’ हे नवे मोबाईल ॲप विकसित केले आहे. या ॲपचा लोकार्पण सोहळा रविवार, दि. १६ नोव्हेंबर २०२५ रोजी सायंकाळी ६ वाजता एरंडवणे येथील शकुंतला जगन्नाथ शेट्टी ऑडिटोरीयम, कर्नाटक हायस्कूल येथे पार पडणार आहे, अशी माहिती पवित्रम फाउंडेशनचे अध्यक्ष श्री सुबोध शहा यांनी पत्रकार परिषदेत दिली.
पत्रकार परिषदेला सुबोध शहा, तुषार कुलकर्णी, शशांक मेंगडे, सारंग देव, राजेश तोळबंदे, आशिष कांटे, किशोर सरपोतदार उपस्थित होते. या ॲपचे लोकार्पण श्रीराम जन्मभूमी न्यास, अयोध्या चे कोषाध्यक्ष आणि श्रीकृष्ण जन्मभूमी न्यास, मथुराचे उपाध्यक्ष प.पू. स्वामी गोविंददेव गिरी महाराज यांच्या हस्ते होणार आहे. तसेच कार्यक्रमाला प्रमुख पाहुणे म्हणून राज्याचे उच्च व तंत्र शिक्षण तसेच संसदीय कार्य मंत्री चंद्रकांत पाटील उपस्थित राहणार आहेत.
शशांक मेंगडे म्हणाले, या ॲपच्या माध्यमातून हिंदू व्यापारी व ग्राहकांना परस्परांशी जोडले जाऊन स्वदेशी आणि धार्मिक मूल्यांवर आधारित व्यापार प्रणाली मजबूत करण्यास मदत होणार आहे. या नव्या मोबाईल ॲप द्वारे व्यापारी आपली उत्पादने व सेवा हिंदू ग्राहकांपर्यंत थेट पोहोचवू शकतील. ग्राहकांना देखील विश्वासार्ह हिंदू व्यावसायिकांची माहिती एका क्लिकवर उपलब्ध होईल. ॲपच्या माध्यमातून समाजात आर्थिक आत्मनिर्भरतेचा विचार बळकट करण्याचा प्रयत्न फाऊंडेशनकडून करण्यात येत आहे.
तुषार कुलकर्णी म्हणाले, पवित्रम् फाऊंडेशन गेल्या काही काळापासून हिंदू व्यापाऱ्यांना एकत्र आणून त्यांच्यातील आर्थिक सहकार्य वृद्धिंगत करण्यासाठी कार्यरत आहे. संस्थेच्या मते, हिंदूंनी हिंदूंकडून खरेदी करावी आणि परस्परांना आर्थिकदृष्ट्या सक्षम बनवावे, हा या उपक्रमाचा मूळ हेतू आहे. या माध्यमातून हिंदू व्यापाऱ्यांच्या व्यवसायवृद्धीसाठी विविध प्रशिक्षण, मार्गदर्शन आणि नेटवर्किंगची संधी उपलब्ध करून देण्यात येत आहे.
हिंदू समाजाच्या आर्थिक सक्षमीकरणासाठी आपल्याला एकत्र येणे आवश्यक आहे. ‘पवित्रम्’ ॲप हे केवळ तांत्रिक साधन नसून, हिंदू व्यापारी आणि ग्राहकांना जोडणारे एक सशक्त व्यासपीठ आहे. या उपक्रमाद्वारे ‘हिंदू खरेदी हिंदूंकडून’ ही संकल्पना वास्तवात आणण्याचा आमचा प्रयत्न आहे. या सोहळ्यात समाजातील विविध व्यावसायिक, उद्योगपती, सामाजिक कार्यकर्ते आणि युवकांनी सहभागी व्हावे, असे आवाहन पवित्रम् फाऊंडेशनतर्फे करण्यात आले आहे.
