पुणे, २१ एप्रिल २०२६: पुणे ऑब्स्टेट्रिक अँड गायनॅकोलॉजिकल सोसायटी (पीओजीएस) च्या ४१व्या इन्स्टॉलेशन सीएमईचा भव्य सोहळा नुकताच अक्षय तृतीयेच्या शुभमुहूर्तावर पार पडला. याप्रसंगी नवीन कार्यकारिणीचा पदग्रहण समारंभ पार पडला. प्रख्यात शिक्षणतज्ज्ञ व बारामती शासकीय वैद्यकीय महाविद्यालयाच्या माजी विभागप्रमुख डॉ. उमा वानखेडे यांनी पीओजीएसच्या अध्यक्षपदाची धुरा स्वीकारली. त्यांच्यासोबतच नामांकित स्त्रीरोगतज्ज्ञ डॉ. चारुलता बापये यांनी सचिवपद स्वीकारले. नवीन कार्यकारिणी मध्ये डॉ. वैजयंती पटवर्धन (उपाध्यक्ष), डॉ. मीनाक्षी देशपांडे (कार्यकारी उपाध्यक्ष), डॉ. अर्चना पुंगलिया (क्लिनिकल सेक्रेटरी) आणि डॉ. अमोल लुंकड (खजिनदार) यांचा समावेश आहे.
या कार्यक्रमाला प्रमुख पाहुणे म्हणून सिम्बायोसिस इंटरनॅशनल युनिव्हर्सिटीच्या प्र-कुलपती डॉ. विद्या येरवडेकर, विशेष अतिथी द फेडरेशन ऑफ ऑब्स्टेट्रिक ॲन्ड गायनेकोलॉजिकल सोसायटीज ऑफ इंडिया (फॉग्सी) चे अध्यक्ष डॉ. भास्कर पाल आणि एएमओजीएस चे अध्यक्ष डॉ. अमेय पुरंदरे आदी मान्यवर उपस्थित होते. याबरोबरच पुणे शहरातील सर्व माजी अध्यक्ष आणि नामवंत स्त्रीरोगतज्ज्ञ उपस्थित होते.
याच सोहळ्याच्या निमित्ताने प्रगती २०२६ – स्टे करंट, स्टे अहेड या ज्ञानवर्धक शैक्षणिक परिषदेचेही उद्घाटन करण्यात आले. या परिषदेत विविध चर्चासत्रे, विचारप्रवर्तक वादविवाद सत्रे, दैनंदिन क्लिनिकल प्रॅक्टिससाठी मार्गदर्शन, प्राध्यापक अंजनेयुलू ओरेशन आणि डॉ. ए. व्ही. उमराणीकर ओरेशन यांचा समावेश होता.
हा सोहळा केवळ पदग्रहणाचा नव्हता, तर स्त्रीआरोग्य सेवेत सातत्याने उत्कृष्टता साध्य करण्याचा, नव्या विचारांना स्वीकारण्याचा आणि रुग्णसेवेत अधिक संवेदनशील व अद्ययावत राहण्याचा एक सामूहिक संकल्प होता. पीओजीएस ही संस्था पुढील काळातही शिक्षण, संशोधन आणि सामाजिक बांधिलकी यांचा समतोल साधत स्त्रीआरोग्य क्षेत्रात मार्गदर्शक ठरेल, असा विश्वास या प्रसंगी व्यक्त करण्यात आला.
