पुणे : शहरातील व्यापारी क्षेत्रातील कर्तृत्ववान व्यक्तींना गौरविण्यासाठी स्टेशनरी, कटलरी एंड जनरल मर्चेंट असोसिएशनच्या वतीने वार्षिक पुरस्कार सोहळ्याचे आयोजन करण्यात आले आहे. व्यापारी एकता दिनानिमित्त सोमवार, दि. १ जून २०२६ रोजी सायं. ५.३० वा. नविपेठ येथील एस. एम. जोशी सभागृहात हा दिमाखदार कार्यक्रम होणार आहे. कार्यक्रमाच्या अध्यक्षस्थानी माजी खासदार विनय सहस्रबुद्धे तर प्रमुख पाहुणे म्हणून ज्येष्ठ बँकिंग तज्ञ विद्याधर अनास्कर उपस्थित राहणार असल्याची माहिती अध्यक्ष संजय राठी यांनी पत्रकार परिषदेत दिली.
पत्रकार परिषदेला उपाध्यक्ष नितीन पंडित, सचिव किशोर चांडक, खजिनदार सुनील शिंगवी तसेच सूर्यकांत पाठक, अरविंद पटवर्धन, मदनसिंह राजपूत, राजेश गांधी, सुरेश नेरगावकर, सचिन जोशी, मोहन साखरिया, किशोर पिरगल, अनिल प्रभुने, मनीष परदेशी, किरण चौहान, अविनाश मुजुमदार, धनंजय रामलिंगे, सागर काकडे, सुमित कुडचे आदी मान्यवर उपस्थित होते.
असोसिएशनतर्फे देण्यात येणारा व्यापारी भूषण पुरस्कार यंदा विकी पॉलिमर्स प्रा. लि. चे दिलीप कुंभोजकर यांना प्रदान करण्यात येणार आहे. व्यापारी भूषण पुरस्काराचे स्वरूप पुणेरी पगडी, सन्मानचिन्ह, सन्मानपत्र, शाल, श्रीफळ असे आहे. तसेच सर्वोत्तम दुकान पुरस्कार जयश्री ग्रोसरी अँड ड्रायफ्रूट्सचे श्याम अग्रवाल, उत्कृष्ट विक्रेता कामगिरी पुरस्कार अरुणकुमार आणि कंपनीचे सचिन चांडक, कै. डॉ. धनंजय व साधनाताई गोरे स्मृती पुरस्कार बाजीराव रस्त्यावरील आशा मेहता, उत्कृष्ट महिला व्यापारी पुरस्कार तुळशीबागेतील सुवर्ण कलाकार स्वाती आंबासनकर आणि फिनिक्स पुण्याचा अभिमान पुरस्कार दीपक केटरर्सचे दीपक आणि निखिल मालानी यांना प्रदान करण्यात येणार आहे. या पुरस्कारांचे स्वरूप सन्मानचिन्ह, सन्मानपत्र, श्रीफळ असे असणार आहे.
हा पुरस्कार सोहळा यंदा २८ व्या वर्षात पदार्पण करत असून, दरवर्षी व्यापारी एकता दिनानिमित्त आयोजित केला जातो. व्यापारी क्षेत्रात कर्तृत्व, प्रगती व सामाजिक बांधिलकी जपणा?्या उद्योजकांना या पुरस्कारांद्वारे गौरविण्यात येते. स्वच्छता, सादरीकरण, आधुनिकता व ग्राहकांशी असलेले संबंध या निकषांवर निवड करण्यात येते.
यापूर्वी विश्वास जोशी (गिरीकंद ट्रॅव्हल्स), खिमजी गाला (गुडलक सेल्स डेपो), थ्रिटी पूनावाला व फरेशिद पटेल (दोराबजी अँड कंपनी), प्रदीप मराठे (कॉटन किंग), सूर्यकांत पाठक (ग्राहक पेठ), फतेचंद रांका (रांका ज्वेलर्स), कृष्णचंद्रजी आर्य (सुदर्शन स्टेशनरी), बाबुशेठ डाटा (लक्ष्मीनारायण चिवडा), चकोर गांधी (जव्हार ट्रेडिंग), राजेश शाह (जयराज ग्रुप), सचिन मालपाणी (बेकलाईट कंपनी), कृष्णकुमार गोयल (कोहिनूर ग्रुप) व राजेंद्र बांठिया आदींना व्यापारी भूषण पुरस्काराने सन्मानित करण्यात आले आहे.
