*अखिल भारतीय पूर्व सैनिक सेवा परिषद महाराष्ट्र व गोवा राज्याची वार्षिक सर्वसाधारण सभा कोल्हापुरात संपन्न*

पुणे
( प्रतिनिधी )
अखिल भारतीय पूर्व सैनिक सेवा परिषद ( ABPSSP ),महाराष्ट्र व गोवा यांच्या वतीने २९ आणि ३० ऑगस्ट २०२६ रोजी “राजाभाऊ भोसले स्मृती भवन,” कोल्हापूर येथे राज्यस्तरीय वार्षिक सर्वसाधारण सभा ( AGM ) आयोजित करण्यात आली होती.
या दोन दिवसीय बैठकीला महाराष्ट्रातील सात प्रांतांचे प्रतिनिधित्व करणारे मातृशक्तीसह एकूण ६१ सदस्य आणि संघटनेचे सर्व पदाधिकारी उपस्थित होते.या वार्षिक सर्वसाधारण सभेचे अध्यक्षपद अखिल भारतीय पूर्व सैनिक सेवा परिषद,महाराष्ट्र व गोवा चे अध्यक्ष एअर मार्शल प्रदीप बापट (निवृत्त) यांनी भूषवले.
वार्षिक सर्वसाधारण सभेत मागील आर्थिक वर्षात राज्यातील सर्व सात प्रांतांनी केलेल्या उपक्रमांचा आणि कामगिरीचा सविस्तर आढावा घेण्यात आला,तसेच चालू आर्थिक वर्षातील उपक्रमांचे नियोजन करण्यात आले. पदाधिकाऱ्यांनी आपले अहवाल सादर केले आणि संघटना बळकट करणे तसेच माजी सैनिक आणि त्यांच्या कुटुंबांपर्यंत पोहोचून त्यांच्या सेवा कल्याणकारी कार्याचा विस्तार करण्याच्या उद्देशाने विविध उपक्रमांवर चर्चा केली.
या बैठकीचा मुख्य भर आगामी राष्ट्रीय वार्षिक सर्वसाधारण सभेवर होता,जी २ ते ४ ऑक्टोबर २०२६ दरम्यान कणेरी मठ,कोल्हापूर येथे होणार आहे.या राष्ट्रीय मेळाव्याच्या पूर्वतयारीचा आणि नियोजनाचा सविस्तर आढावा घेण्यात आला.या कार्यक्रमात देशभरातून सुमारे पाचशे माजी सैनिक आणि मातृशक्ती सदस्य सहभागी होणार आहे.
तसेच,महाराष्ट्र राज्याचे माननीय राज्यपाल महामहीम जिष्णू देव वर्मा यांनी या राष्ट्रीय वार्षिक सर्वसाधारण सभेच्या उद्घाटन सत्राचे अध्यक्षपद भूषवण्यास सहमती दर्शविली असल्याचे माहितीमध्ये सांगण्यात आले.तर महाराष्ट्र राज्याचे माजी सैनिक कल्याण मंत्री शंभूराज देसाई हे समारोप सत्राचे अध्यक्षस्थान भूषवण्याची शक्यता आहे.
राज्यस्तरीय वार्षिक सर्वसाधारण सभेचा एक भाग म्हणून,माजी सैनिकांशी संवाद साधण्यासाठी आणि त्यांना मार्गदर्शन करण्यासाठी डॉ सूर्यकांत वाघ,महेश बांडकर आणि मुकुंद भावे यांना विशेष अतिथी म्हणून आमंत्रित करण्यात आले होते त्यांच्या संवादातून माजी सैनिक समुदायाशी संबंधित विषयांवर प्रकाश टाकण्यात आला आणि उपस्थितांना बहुमोल मार्गदर्शन लाभले.संघटनेच्या उपक्रमांना अधिक बळकट करण्याच्या पुनरुच्चारित संकल्पासह या वार्षिक सर्वसाधारण सभेची सांगता झाली.