पुणे, दि. ५ : भारतीय सैन्यदल, नौदल व वायुदलामध्ये अधिकारी पदावर भरती होण्यासाठी आवश्यक असलेल्या सर्व्हिसेस सिलेक्शन बोर्ड (एसएसबी) परीक्षेच्या पूर्वतयारीसाठी पात्र उमेदवारांना नाशिक येथील छात्रपूर्व प्रशिक्षण केंद्रात मोफत प्रशिक्षणाची संधी उपलब्ध करून देण्यात आली असून जिल्ह्यातील इच्छुक व पात्र उमेदवारांनी अधिकारी पदाची संधी मिळविण्यासाठी जिल्हा सैनिक कल्याण कार्यालय, पुणे येथे १६ ऑक्टोबर २०२६ पर्यंत मुलाखतीसाठी उपस्थित रहावे, असे आवाहन जिल्हा सैनिक कल्याण अधिकारी मेजर एस. फिरासत यांनी केले आहे.
हा प्रशिक्षण अभ्यासक्रम १९ ते २८ ऑक्टोबर २०२६ या कालावधीत आयोजित करण्यात आला आहे. प्रशिक्षण कालावधीत प्रशिक्षणार्थींना निःशुल्क प्रशिक्षण, निवास व भोजनाची सुविधा उपलब्ध करून देण्यात येणार आहे.या प्रशिक्षणासाठी निवड झालेल्या प्रशिक्षणार्थींनी १८ ऑक्टोबर २०२६ रोजी सकाळी १० वाजता छात्रपूर्व प्रशिक्षण केंद्र, नाशिक रोड, नाशिक येथे उपस्थित रहावे.
पुणे मुलाखतीस येताना उमेदवारांनी Department of Sainik Welfare, Pune (DSW) यांच्या संकेतस्थळावरील प्रवेशपत्र व त्यासोबत असलेल्या परिशिष्टाची प्रत घेऊन ती पूर्ण भरून दोन प्रती सोबत आणाव्यात.
या प्रशिक्षणासाठी कंबाईंड डिफेन्स सर्व्हिसेस एक्झामिनेशन (CDSE-UPSC) किंवा नॅशनल डिफेन्स अकॅडमी एक्झामिनेशन (NDA-UPSC) उत्तीर्ण होऊन सर्व्हिसेस सिलेक्शन बोर्ड मुलाखतीसाठी पात्र ठरलेले उमेदवार पात्र आहेत. तसेच एनसीसी विशेष प्रवेशासाठी एसएसबी मुलाखतीचे बोलावणे पत्र, टेक्निकल ग्रॅज्युएट कोर्ससाठी एसएसबी मुलाखतीचे बोलावणे पत्र असलेले उमेदवार तसेच विद्यापीठ प्रवेश प्रणालीसाठी एसएसबीचे बोलावणे पत्र किंवा एसएसबीसाठी शिफारस केलेल्या यादीत नाव असलेले उमेदवारही पात्र आहेत.
अधिक माहितीसाठी छात्रपूर्व प्रशिक्षण केंद्र, नाशिक रोड, नाशिक येथील प्रभारी अधिकाऱ्यांशी training.pctcnashik@gmail.com या ई-मेलवर किंवा ०२५३-२४५१०३२ या दूरध्वनी क्रमांकावर तसेच ९१५६०७३३०६ या व्हॉट्सॲप क्रमांकावर कार्यालयीन वेळेत संपर्क साधावा, असे आवाहन जिल्हा सैनिक कल्याण अधिकारी, पुणे यांनी केले आहे.
०००
