*
पुणे, दि. ११ : पनवेल महानगरपालिकेच्या आस्थापनेवरील गट ‘अ’ ते गट ‘ड’ मधील ४१ संवर्गातील ३७७ पदांकरीता राज्यातील विविध जिल्ह्यातील एकूण ५७ परीक्षाकेंद्रांवर ८ ते ११ डिसेंबर या कालावधीत तीन सत्रात घेतलेल्या परीक्षेत एकुण ५५ हजार २१४ उमेदवार बसले होते. ही परीक्षा टिसीएस कंपनीमार्फत घेण्यात आली असून पुणे जिल्ह्यातील ४ परीक्षा केंद्रावर कोणत्याही केंद्रावर अनुचित प्रकार न होता सुरळीत पार पडली, अशी माहिती जिल्हाधिकारी कार्यालयातील नगरपालिका प्रशासन शाखेचे जिल्हा सहआयुक्त व्यंकटेश दुर्वास यांनी दिली आहे.
परीक्षा सुरळीतपणे पार पाडण्यासाठी श्री. दुर्वास यांनी जिल्हा समन्वयक म्हणून काम पाहिले. परीक्षा केंद्रावर केंद्र निरीक्षक तथा समन्वयक म्हणून पुणे जिल्ह्यातील नगरपरिषदा, नगरपंचायतीचे मुख्याधिकारी यांनी कामकाज पार पाडले. परीक्षा केंद्रावर कोणताही अनुचित प्रकार घडू नये व कायदा सुव्यवस्थेचा प्रश्न निर्माण होऊ नये याकरीता सर्व परीक्षा केंद्रावर पोलिस कर्मचारी नेमण्यात आले होते.
परीक्षा केंद्रावर उमेदवारांनी कोणतेही इलेक्ट्रॉनिक उपकरण अथवा मोबाईलचा वापर होऊ नये याकरिता योग्य ती दक्षता घेण्यात आली होती. तसेच शासन मान्यता प्राप्त ईसीआयएल या कंपनीचे मोबाईल जॅमर परीक्षा केंद्रावर बसविण्यात आलेले होते, अशीही माहिती श्री.दुर्वास यांनी दिली आहे.
