मुंबई | डिसेंबर २०२५ — १९५१ साली एका छोट्याशा प्रेरणादायी ठिणगीतून सुरू झालेली चिन्मय चळवळ आज जगभरातील ३५०हून अधिक केंद्रांचे जागतिक जाळे बनली आहे. वेदांताचा प्रसार, मूल्याधिष्ठित शिक्षण, युवक सशक्तीकरण आणि समाजोपयोगी उपक्रमांद्वारे लाखो जीवनांना स्पर्श करणाऱ्या या चळवळीच्या ७५ वर्षांच्या गौरवशाली वाटचालीनिमित्त चिन्मय अमृत महोत्सव साजरा करण्यात येत आहे. हा महोत्सव परंपरेला आधुनिक काळाशी जोडणारा आणि शाश्वत मूल्यांना आजच्या संदर्भात अधोरेखित करणारा आहे.
या महोत्सवाचा केंद्रबिंदू असलेली चिन्मय अमृत यात्रा ही २९५ दिवसांची देशव्यापी आध्यात्मिक यात्रा असून, चिन्मय ज्योती आणि पूज्य गुरुदेव स्वामी चिन्मयानंद यांच्या शिकवणी देश-विदेशातील केंद्रांपर्यंत पोहोचवणार आहे. ही यात्रा ३१ डिसेंबर २०२५ रोजी पुण्याजवळील चिन्मय विभूती येथून पूज्य स्वामी स्वरूपानंदजी विश्व प्रमुख, चिन्मय मिशन ह्यांच्या शुभ हस्ते प्रारंभ होऊन पुण्यातील रास्ता पेठेतील गणपती मंदिरात पोहोचेल — याच ठिकाणी १९५१ साली पूज्य गुरुदेवांनी आपले पहिले सार्वजनिक प्रवचन दिले, ज्यातून या जागतिक चळवळीची बीजे रोवली गेली.
परंपरा, ज्ञान आणि नवचैतन्याचा संगम
चिन्मय अमृत महोत्सव अंतर्गत पूज्य स्वामी स्वरूपानंदजी यांच्या हस्ते दोन नव्या पुस्तकांचे प्रकाशन करण्यात येणार आहे —
‘गीता पंचामृत’ : भगवद्गीतेतील पाच प्रमुख श्लोकांद्वारे गीतेचा सारगर्भ संदेश सर्वसामान्यांपर्यंत पोहोचवणारे पुस्तक
‘हनुमान चालीसा – अंतर्दृष्टी’ : भक्ती, सामर्थ्य आणि समर्पण यांचा अर्थ उलगडणारे चिंतन
ही दोन्ही पुस्तके प्रसाद स्वरूपात जगभरातील सर्व चिन्मय केंद्रांमध्ये, महोत्सवातील सिग्नेचर कार्यक्रमांदरम्यान तसेच चिन्मय अमृत यात्रेदरम्यान वितरित केली जाणार आहेत.
या ऐतिहासिक वर्षाच्या स्मरणार्थ, चिन्मय मिशनकडून दोन विशेष डिजिटल सादरीकरणांचे अनावरण करण्यात येणार आहे. यामध्ये एक सादरीकरण पूज्य स्वामी चिन्मयानंद सरस्वती यांच्या जीवनकार्य व वारशाचा मागोवा घेणारे असेल, तर दुसरे सादरीकरण हे आपल्या प्रकारातील पहिले—कृत्रिम बुद्धिमत्ता आधारित—त्यांच्या ‘गीता पंचामृत’ पठणाचे पुनर्निर्माण असेल. या माध्यमातून भगवद्गीतेचा सार पाच श्लोकांत मांडण्यात येणार असून, आजच्या विशेषतः युवा पिढीसाठीही ते कालातीत व अत्यंत प्रेरणादायी ठरणारे आहे.
महोत्सवाची वैशिष्ट्ये : ‘कालातीत प्रवास’
हा महोत्सव ‘टाइमलेस जर्नी’ म्हणून साजरा होत असून, सर्व वयोगटांतील साधकांना सहभागी करून घेणारे जागतिक उपक्रम यामध्ये समाविष्ट आहेत :
१०८ समष्टी हनुमान चालीसा हवन — जगभरातील ६३+ ठिकाणी
भव्य सामूहिक गीता पठण कार्यक्रम — ६०+ जागतिक केंद्रांमध्ये
चिन्मय अमृत यात्रा — २९५ दिवसांचा प्रवास करत गुरुदेवांचा संदेश केंद्र-केंद्र पोहोचवणारी यात्रा
गीता पंचामृत — गीतेचा सार पाच श्लोकांतून सुलभपणे मांडणारा उपक्रम
चिन्मय म्युझिकल — पूज्य गुरुदेवांच्या जीवनकार्यावर आधारित भव्य नाट्य-आध्यात्मिक सादरीकरण
नवी दिल्ली येथे जागतिक समारोप
चिन्मय अमृत महोत्सवाचा समारोप २३ ते २५ ऑक्टोबर २०२६ दरम्यान नवी दिल्लीतील भारत मंडपम येथे होणाऱ्या जागतिक चिन्मय संमेलनात होणार आहे. या तीन दिवसीय संमेलनात जगभरातील आध्यात्मिक नेते, शिक्षक, युवक आणि संपूर्ण चिन्मय कुटुंब एकत्र येणार आहे.
वारशाचा गौरव आणि भविष्यासाठी पुनर्प्रतिज्ञा
चिन्मय अमृत महोत्सव हा केवळ उत्सव नसून, तो एका समृद्ध वारशाचा गौरव आणि भविष्यासाठी पुनर्प्रतिज्ञा आहे. पिढ्यान्पिढ्यांना दिशा देणाऱ्या या चळवळीचे कार्य आजही स्पष्टता, उद्देश आणि सेवाभाव यांचे दीपस्तंभ म्हणून समाजाला मार्गदर्शन करत आहे. संस्कृती आणि खंड ओलांडत माणसांना जोडण्याची भूमिका हा महोत्सव अधोरेखित करतो.
अधिक माहितीसाठी भेट द्या
:
https://chinmaya75.org/amrit
