*जनतेच्या कराच्या पैशावर धर्माचे राजकारण थांबवा!” शजोविमंशेकाएमएसट्रस्ट, शेतकरी संघटनेचे सरकारला_ अहवान.
*भारताचे विद्यमान पंतप्रधान यांनी जाहीर केले आहे की भारत आज गंभीर आर्थिक आणि सामाजिक संकटातून जात आहे. वाढती महागाई, बेरोजगारी, शेतीचे उद्ध्वस्त होत चाललेले अर्थकारण, उद्योगधंद्यांवरील मंदी, वाढते कर्ज, कोसळणारी खरेदीशक्ती आणि दुसरीकडे लाखो-कोट्यवधी रुपयांची धार्मिक व पर्यटनाच्या नावाखाली होणारी उधळपट्टी — हा विरोधाभास आता सामान्य जनतेच्या सहनशक्तीच्या पलीकडे गेला आहे. देशातील कष्टकरी, शेतकरी, कामगार आणि मध्यमवर्गीय जनता जगण्यासाठी संघर्ष करीत असताना महाराष्ट्र व इतर सरकारे मात्र भव्य कुंभमेळे, धार्मिक सोहळे आणि प्रचारकी पर्यटन प्रकल्पांवर हजारो कोटी रुपये खर्च करीत आहे.*
आज देशाला खरी गरज आहे ती रुग्णालयांची, रोजगाराची, शेतकऱ्यांच्या कर्जमाफीची, विद्यार्थ्यांच्या शिक्षणाची, ग्रामीण भागातील पाणी योजनांची आणि उद्योगधंदे उभे करण्याची. पण सरकारची प्राथमिकता वेगळी दिसते. लोक उपाशी असताना सत्ता मात्र धार्मिक भव्यतेचे प्रदर्शन करण्यात व्यस्त आहे.
*सुमारे ३५ हजार कोटी रुपयांचा कुंभमेळा हा फक्त धार्मिक कार्यक्रम नाही; तो आजच्या परिस्थितीत देशाच्या आर्थिक विवेकबुद्धीवर प्रश्न उपस्थित करणारा विषय बनला आहे. श्रद्धा आणि धर्म हा प्रत्येक नागरिकाचा वैयक्तिक अधिकार आहे. कोणालाही कुंभमेळा करायचा असेल, स्नान करायचे असेल, पूजा-अर्चा करायची असेल तर त्यांनी ती नक्की करावी. पण त्या श्रद्धेचा खर्च देशातील गरीब करदात्या नागरिकांवर का टाकला जात आहे?*
भारतातील लाखो शेतकरी आज कर्जबाजारी आहेत. अनेक तरुण नोकरीअभावी आत्महत्येच्या उंबरठ्यावर आहेत. गरीब कुटुंबांना दोन वेळच्या जेवणाची भ्रांत आहे. महिलांना महागाईमुळे संसार चालवणे कठीण झाले आहे. अशा वेळी हजारो कोटी रुपये कुंभमेळ्यासारख्या कार्यक्रमांवर खर्च करणे म्हणजे जनतेच्या जखमेवर मीठ चोळण्यासारखे आहे.
जर कुंभमेळा हा श्रद्धेचा आणि अध्यात्माचा विषय असेल, तर तो साधेपणाने का होऊ शकत नाही? खरे श्रद्धावान लोक स्वतःच्या खर्चाने यात्रेला जाऊ शकतात. संत, साधू, भक्त आणि धार्मिक संघटनांनी स्वतःच्या संसाधनांतून कार्यक्रम आयोजित करावा. सरकारने त्यासाठी लाल गालिचे अंथरू नयेत, मोफत सुविधा पुरवू नयेत, प्रचारासाठी अब्जावधी रुपये खर्च करू नयेत.
देशभक्ती म्हणजे केवळ घोषणा देणे नाही. देशभक्ती म्हणजे संकटाच्या काळात राष्ट्राच्या अर्थव्यवस्थेची जबाबदारी समजून घेणे. जर देश आर्थिक अडचणीत असेल, तर सर्वात आधी सरकारनेच काटकसरीचा आदर्श घालून दिला पाहिजे. सामान्य नागरिकांना “बचत करा”, “कमी खर्च करा” असे सांगणाऱ्या सरकारने स्वतःच्या खर्चावर नियंत्रण ठेवले पाहिजे.
आज सरकारकडून आयोजित केले जाणारे अनेक पर्यटन प्रकल्प, धार्मिक महोत्सव, भव्य जाहिराती, राजकीय प्रचार मोहिमा आणि दिखाऊ कार्यक्रम यावर प्रचंड पैसा खर्च होतो. या खर्चातून सरकारला प्रत्यक्ष आर्थिक फायदा किती होतो याचे कोणतेही पारदर्शक उत्तर जनतेला दिले जात नाही. उलट करदात्यांच्या पैशातून काही निवडक उद्योगसमूह, कंत्राटदार आणि राजकीय व्यवस्थांनाच फायदा होत असल्याचा आरोप सातत्याने होत आहे.
*देशातील सामान्य माणूस आज करांच्या ओझ्याखाली दबला आहे. पेट्रोल, डिझेल, गॅस, वीज, अन्नधान्य, शिक्षण आणि आरोग्य या सर्व गोष्टी महाग झाल्या आहेत. सरकार महसूल वाढवण्यासाठी जनतेवर करांचा मारा करते, पण त्याच पैशांची उधळपट्टी धार्मिक पर्यटनावर करते. ही आर्थिक नीती देशाला आणखी संकटात ढकलणारी आहे.*
जर सरकारला खरोखरच अध्यात्म आणि धर्माची काळजी असेल, तर त्यांनी संत तुकाराम, संत गाडगेबाबा, महात्मा फुले आणि डॉ. बाबासाहेब आंबेडकर यांच्या विचारांकडे पाहावे. या महापुरुषांनी समाजसेवा, शिक्षण, स्वच्छता, समानता आणि जनकल्याण यालाच खरा धर्म मानले. उपाशी माणसाला अन्न देणे, शेतकऱ्याला न्याय देणे, बेरोजगाराला रोजगार देणे आणि रुग्णाला उपचार देणे — हाच खरा राष्ट्रधर्म आहे.
आज भारताला धार्मिक दिखाव्यापेक्षा आर्थिक शिस्तीची गरज आहे. देशाची तिजोरी रिकामी होत असताना सरकारने भव्य धार्मिक मेळावे आयोजित करणे हे आर्थिकदृष्ट्या आणि नैतिकदृष्ट्या चुकीचे आहे. जर सरकार खरोखर देशहिताचा विचार करीत असेल, तर त्यांनी कुंभमेळ्यासारख्या अब्जावधी रुपयांच्या खर्चिक प्रकल्पांना तात्काळ स्थगिती द्यावी.
त्या निधीचा वापर शेतकरी आत्महत्या थांबवण्यासाठी, ग्रामीण रोजगारासाठी, विद्यार्थ्यांच्या शिक्षणासाठी, सार्वजनिक आरोग्यासाठी आणि लघुउद्योगांना उभारी देण्यासाठी करावा. देशातील प्रत्येक रुपया हा जनतेच्या घामाचा आहे; तो धार्मिक प्रदर्शनासाठी नव्हे तर जनकल्याणासाठी वापरला गेला पाहिजे.
*सरकारने आता ठरवावे — देश वाचवायचा की दिखावा करायचा?*
*आज वेळ आली आहे की देशातील सर्व सजग नागरिकांनी आवाज उठवावा. राष्ट्रप्रेमाचा अर्थ सरकारी पैशावर भव्य मेळावे उभे करणे नसून संकटात असलेल्या जनतेच्या पाठीशी उभे राहणे हा आहे. श्रद्धा वैयक्तिक असू शकते, पण करदात्यांचा पैसा राष्ट्रीय जबाबदारीने खर्च केला गेला पाहिजे.*
*भारताचे पंतप्रधान आणि केंद्र सरकार यांनी तात्काळ सर्व खर्चिक धार्मिक पर्यटन प्रकल्पांचा फेरआढावा घ्यावा. कुंभमेळ्यासह अनावश्यक खर्च थांबवून आर्थिक काटकसर लागू करावी. अन्यथा “जनतेला बचतीचे धडे आणि सत्तेला उधळपट्टीचे स्वातंत्र्य” हा अन्याय देशातील गरीब जनता कधीच विसरणार नाही.*
*जय महाराष्ट्र | जय भारत |*
* जय किसान | जय संविधान.*
*– विठ्ठल राजे पवार.*
राष्ट्रीय अध्यक्ष तथा निमंत्रक
शरदजोशी विचारमंच शेतकरी कामगार एम. एस. फाऊंडेशन भारत
व शेतकरी संघटना महासंघ महाराष्ट्र राज्य.
*भ्रमणध्वनी संपर्क क्रमांक 7887313311/9422517044, ईमेल sjvmss.vp9@gmail.com nvithal.fams@gmail.com*
