पुणे, दि. १८ (जिमाका,वृत्तसेवा) : आदिवासी समाजातील वारली जमातीची चित्रकला ही अत्यंत वैशिष्ट्यपूर्ण, आकर्षक आणि अद्वितीय मानली जाते. वारली पेंटिंगने आज देशाच्या सीमा ओलांडून आंतरराष्ट्रीय स्तरावरही आपली वेगळी ओळख निर्माण केली आहे. या पारंपरिक कलेला अधिक प्रोत्साहन मिळावे आणि आदिवासी कलावंतांना व्यासपीठ उपलब्ध व्हावे या उद्देशाने आदिवासी संशोधन व प्रशिक्षण संस्था, पुणे यांच्या वतीने २१ मे २०२६ पर्यंत वारली चित्रकला कार्यशाळेचे आयोजन यश रेजेंसी, ४१२-सी, के. एम. मुन्शी रोड, लक्ष्मी सोसायटी, मॉडेल कॉलनी, शिवाजीनगर, पुणे येथे आयोजित करण्यात आली आहे.
या कार्यशाळेमध्ये पालघर जिल्ह्यातील डहाणू, तलासरी, पालघर तालुक्यातील तसेच अहिल्यानगर जिल्ह्यातील अकोले तालुक्यातील अनुसूचित जमातीतील वारली चित्रकार सहभागी झाले आहेत.
ही कार्यशाळा केवळ चित्रकार आणि कलावंतांना प्रोत्साहन देणारी नसून उद्योजक, व्यावसायिक तसेच कला क्षेत्रातील गुंतवणूकदारांसाठीही उपयुक्त ठरणार आहे. व्यवसाय व उद्योगांच्या ब्रँडिंगसाठी वारली चित्रकलेचा प्रभावी वापर करता येऊ शकतो. उद्योजक, व्यावसायिक तसेच कलाप्रेमींनी या कार्यशाळेस भेट देऊन आदिवासी कलेला प्रोत्साहन द्यावे, असे आवाहन मंजिरी मनोलकर, आयुक्त, आदिवासी संशोधन व प्रशिक्षण संस्था, पुणे यांनी केले आहे.
0000
