पुणे, २३ ऑक्टोबर २०२६ : फोर्स मोटर्स लिमिटेडने जुन्या वाहनांची जबाबदार विल्हेवाट आणि पुनर्वापराला प्रोत्साहन देण्यासाठी नवीन उपक्रमाची घोषणा केली आहे. रोझमर्टा ऑटो रिसायकलिंग प्रायव्हेट लिमिटेडसोबतच्या सहयोगातून कंपनी पात्र ग्राहकांना अधिकृत वाहन स्क्रॅपिंग सुविधा उपलब्ध करून देण्यास मदत करणार आहे. या उपक्रमाची सुरुवात दिल्ली-एनसीआर भागातून होणार असून, भविष्यात देशातील इतर भागांतही अशा प्रकारचे सहयोग वाढवण्याची कंपनीची योजना आहे.
या उपक्रमाचा उद्देश वाहनांचे आयुष्य संपल्यानंतर त्यांची योग्य प्रक्रियेद्वारे विल्हेवाट लावणे, पुनर्वापरयोग्य घटकांची पुनर्प्राप्ती करणे आणि संघटित वाहन स्क्रॅपिंगबाबत जनजागृती वाढवणे हा आहे. तसेच, रस्ते वाहतूक आणि महामार्ग मंत्रालयासोबत (एमओआरटीएच) केलेल्या सामंजस्य करारांतर्गत व्यावसायिक वाहनांच्या बदल प्रक्रियेला पाठबळ देण्याच्या कंपनीच्या प्रयत्नांनाही यामुळे बळ मिळणार आहे.
या व्यवस्थेअंतर्गत पात्र फोर्स मोटर्स ग्राहकांना रोझमर्टाच्या नोंदणीकृत वाहन स्क्रॅपिंग सुविधेचा (आरव्हीएसएफ) लाभ घेता येईल. या केंद्रात आवश्यक कागदपत्रांची पूर्तता, वाहनांचे प्रदूषणमुक्तीकरण, सुटे भाग वेगळे करणे आणि पुनर्वापरयोग्य साहित्याचे वर्गीकरण व पुनर्प्राप्ती केली जाईल. लागू नियमांनुसार ग्राहकांना सर्टिफिकेट ऑफ डिपॉझिटसह संबंधित स्क्रॅपिंग कागदपत्रेही उपलब्ध करून दिली जातील.
फोर्स मोटर्सचे व्यवस्थापकीय संचालक प्रसन फिरोदिया म्हणाले, “जबाबदार वाहन उत्पादक म्हणून आमची भूमिका केवळ वाहनांची निर्मिती आणि वितरण करण्यापुरती मर्यादित नाही. वाहनाचे उपयुक्त आयुष्य संपल्यानंतर त्याचे व्यवस्थापनही तितकेच महत्त्वाचे आहे. या उपक्रमातून जबाबदार स्क्रॅपिंग, मौल्यवान घटकांचा पुनर्वापर आणि अधिकृत विल्हेवाट प्रक्रियेला प्रोत्साहन मिळेल.”
वाहनांच्या संपूर्ण जीवनचक्रात शाश्वत पद्धतींना चालना देणे, साधनसंपत्तीचा कार्यक्षम वापर वाढवणे आणि पर्यावरणावरील परिणाम कमी करणे, हे या उपक्रमामागील प्रमुख उद्दिष्ट आहे.
