*
पुणे, दि. 13 : पर्वती विधानसभा मतदारसंघाअंतर्गत प्रत्यक्ष मतदान प्रक्रिया राबविण्यासाठी नियुक्त करण्यात आलेल्या मतदान केंद्र अधिकारी आणि कर्मचाऱ्यांचे दुसरे प्रशिक्षण सत्र निवडणूक निर्णय अधिकारी मनोजकुमार खैरनार यांच्या मार्गदर्शनाखाली संपन्न झाले.
पुणे महानगरपालिकेच्या लोकशाहीर अण्णाभाऊ साठे सभागृह येथे आयोजित करण्यात आलेल्या या प्रशिक्षण सत्रामध्ये मतदान यंत्र आणि व्हिव्हिपॅट बद्दल माहिती देण्यात आली. मतदान प्रक्रियेतील जबाबदाऱ्या, पारदर्शकता, मतदारांची ओळख तपासणी, गुप्त मतदान प्रक्रिया, मतपेटी हाताळणी आणि ईव्हीएम मशीनच्या वापराबाबत सखोल मार्गदर्शन करून ईव्हीएम आणि व्हीव्हीपॅटची कार्यप्रणालीची माहिती श्री. खैरनार यांनी दिली. कर्मचाऱ्यांना मशीनच्या सुसज्जतेबाबत दक्ष राहण्याचे महत्त्व पटवून दिले. तसेच मतदान केंद्रांवरील शांतता आणि सुव्यवस्था राखण्यासाठी आवश्यक तंत्रांचा वापर कसा करावा याचेही मार्गदर्शन केले.
मतदानासाठी आवश्यक असलेल्या प्रशासकीय तसेच तांत्रिक बाबींचे सविस्तर माहिती तसेच मतदान यंत्राच्या हाताळणीचे प्रात्यक्षिकासह प्रशिक्षण यावेळी देण्यात आले. मतदान प्रक्रिया पार पाडण्यासाठी सोपविलेली जबाबदारी चोखपणे पार पाडावी, असे निर्देश श्री. खैरनार यांनी यावेळी दिले.
