🇮🇳 वकिली पवित्र व्यवसाय म्हणून करा- न्या.शर्मिला देशमुख.- श्री शिवाजी मराठा सोसायटीच्या विधी महाविद्यालयात अभिरुप न्यायालय स्पर्धा संपन्न.- 

श्री शिवाजी मराठा सोसायटीच्या विधी महाविद्यालयाच्या वतीने आयोजित छत्रपती श्री शिवाजी महाराज सहावे राज्यस्तरीय अभिरूप न्यायालय स्पर्धा नुकतीच मोठ्या दिमाखात संपन्न झाली .सदरच्या स्पर्धेमध्ये पनवेल चे भागुबाई चंगू ठाकूर विधी महाविद्यालय विजेते ठरले, तर पुण्याचे शंकरराव चव्हाण विधी महाविद्यालय उपविजेते ठरले. शिवाजी मराठा विधी महाविद्यालयातील विद्यार्थिनी युगा कुमारी हिला सर्वोत्कृष्ट प्रतिवादी वकील, तर भागुबाई चंदू ठाकूर महाविद्यालयातील विद्यार्थिनी श्रुती चौबे हिला सर्वोत्कृष्ट वादी वकील म्हणून पारितोषिक देण्यात आले.

स्पर्धेचे उद्घाटन मुंबई उच्च न्यायालयाचे न्यायमूर्ती मा.संदीपजी मारणे सर व मुंबई उच्च न्यायालयाच्या न्यायमूर्ती मा.शर्मिला देशमुख मॅडम यांच्या हस्ते करण्यातआले. याप्रसंगी उच्च न्यायालयाच्या न्यायमूर्ती देशमुख मॅडम यांनी विद्यार्थ्यांना मार्गदर्शन करताना सुचविले की, वकिली व्यवसाय हा पवित्र व्यवसाय म्हणून करणे आवश्यक असून, तो बिझनेस म्हणून करणे उचित नाही. न्या. मारणे सर यांनी वकिली प्रशिक्षणाचे महत्त्व विषद केले व सोसायटीच्या शिक्षण कार्याचे कौतुक केले.

उद्घाटन प्रसंगी प्रमुख जिल्हा न्यायाधीश मा. महेंद्रजी महाजन व मा. सुमंतराव कोल्हे, बार कौन्सिल उपाध्यक्ष ॲड.अहमदखान पठाण व सोसायटी उपाध्यक्ष मा.राजेंद्र जगताप यांनी विद्यार्थ्यांना मार्गदर्शन केले. या प्रसंगी बार कौन्सिल माजी अध्यक्ष ॲड.हर्षद निंबाळकर व ॲड. राजेंद्र उमाप, जिल्हा न्यायाधीश बी.पी.क्षीरसागर आदी मान्यवर उपस्थित होते.

श्री शिवाजी मराठा सोसायटीचे मानद सहसचिव विकास गोगावले, खजिनदार जगदीश जेधे, नियामक मंडळ अध्यक्ष ॲड. सत्येंद्र कांचन, कारभारी मंडळ अध्यक्ष सुरेशराव देसाई, तसेच महाविद्यालय विकास समितीचे अध्यक्ष ॲड .एन डी पाटील, श्री पद्माकर पवार, ऍड.एस.एन.वाकचौरे, ऍड.तानाजी घारे, नियामक मंडळ सदस्य प्रा.जयप्रकाश जगताप, बी.एम.गायकवाड, रघुनंदन जाधव, महादेव पवार, रविंद्र जेधे, जेष्ठ माजी विद्यार्थीनी आशालता देशमुख, नवनियुक्त न्यायाधीश स्नेहा थोरात आदी मान्यवर उपस्थित होते. त्याचप्रमाणे महाविद्यालयाच्या प्राचार्या, प्राध्यापक व प्रशासकीय वर्ग उपस्थित होते.

स्पर्धेचे पारितोषिक वितरण नि.जिल्हा न्यायाधीश डब्ल्यू.के. कनबरकर व के.बी.कटके यांच्या हस्ते करण्यात आले. यावेळी अभिरूप न्यायालय स्पर्धेकरता न्यायाधीश म्हणून काम पाहणारे दिवाणी न्यायाधीश मा.दीपक डोंगरे व मा.शरद मडके, ऍड. नीलिमा वर्तक व प्रा.एस.एम.तांबोळी आदी मान्यवरांनी कामकाज पाहिले .

ॲड.एन.डी.पाटील यांनी कार्यक्रमाचे प्रास्ताविक व स्वागत केले. प्रा.सिद्धकला भावसार यांनी आभार मानले व अभिरुप न्यायालयाचे प्रस्तावित केले. डॉ. अंजली गवळी यांनी आभार मानले. प्रा. मीनाक्षी जाधव यांनी सूत्र संचालन केले.