पुणे : दोन्ही डोळे नसतानाही वायर बॅग तयार करणे, भाज्या निवडणे-चिरणे, शोभेच्या वस्तू तयार करणे अशी कामे सहजतेने करत अंधभगिनींनी आपले कलागुण पुणेकरांसमोर सादर केले. पुणेकरांनी देखील अंधभगिनींनी तयार केलेल्या वस्तू विकत घेत त्यांच्या कलेला आणि प्रयत्नांना प्रोत्साहन दिले.
दिव्यांग व्यक्तींना समाजाच्या मुख्य प्रवाहात आणणे, त्यांना स्वावलंबी बनवणे आणि त्यांच्या कौशल्यांची ओळख समाजासमोर करून देणे या उद्देशाने पुण्यातील समविचारी मैत्रिणींनी ‘प्रोत्साहन २०२५’ या प्रदर्शनाचे आयोजन केले आहे. कर्वे रस्त्याजवळील अश्वमेध हॉल येथे हे प्रदर्शन सुरू आहे.
या प्रदर्शनाचे संयोजन रंजना आठल्ये, रेखा कानिटकर, आरती पटवर्धन, माधुरी पाटणकर, शुभदा करंदीकर, गीता पटवर्धन, आबेदा खान, नीलम भाटवडेकर, अमृता पटवर्धन व रोहिणी अभ्यंकर यांनी केले. महाराष्ट्रातील विविध भागांतून आलेल्या ३१ दिव्यांग व्यक्ती आणि ९ संस्थांचा सहभाग या प्रदर्शनात झाला.
प्रोत्साहन प्रदर्शनाचे उद्घाटन
इंटिग्रेटेड एज्युकेशन सेंटरच्या अमृता भागवत व गती मंद असलेल्या पूजा मुनोत यांच्या हस्ते झाले. फक्त दिव्यांग व्यक्तींनी बनवलेल्या उपयुक्त कलात्मक वस्तू व खाद्यपदार्थांचे प्रदर्शन तसेच विक्री या ठिकाणी करण्यात आले.
विद्या ज्योती स्पेशल स्कूल, प्रिझम फाउंडेशन, शिर्डी साईबाबा अंध महिला वृद्धाश्रम, संवाद, नंदनवन, स्मित फाऊंडेशन, उन्मेष फाऊंडेशन, मैत्र फाऊंडेशन व मोहोर एंटरप्रायझेस या संस्थांनी सहभाग नोंदवला. धायरी येथील दृष्टीहीन वृद्ध महिलांनी वायर बास्केट व मण्यांच्या शोपीस तयार करण्याचे प्रात्यक्षिक सादर केले. याशिवाय दिव्यांग कलाकारांनी करमणुकीचे कार्यक्रम सादर केले.
प्रदर्शन रविवार, २१ सप्टेंबरपर्यंत सर्वांसाठी खुले असून प्रवेश विनामूल्य आहे.
