पुणे, दि. 14 : महाराष्ट्र राज्य कृषि पणन मंडळामार्फत 8 ते 12 जानेवारी, 2025 या कालावधीत श्री गणेश कला क्रीडा रंगमंच, स्वारगेट येथे आयोजित करण्यात आलेल्या दुसऱ्या ‘मिलेट महोत्सव-2025’ महोत्सवाला पुणेकरांनी उत्तम प्रतिसाद दिला. महोत्सवाद्वारे सुमारे 35 लाखांची उलाढाल झाली असून यापुढील काळातही विविध महोत्सव आयोजित करण्यात येणार असल्याची माहिती मंडळाचे कार्यकारी संचालक संजय कदम यांनी दिली.
संयुक्त राष्ट्रसंघाने सन 2023 हे वर्ष ‘आंतरराष्ट्रीय पौष्टिक तृणधान्य वर्ष’ म्हणून साजरे केले. या निमित्ताने देशभर विविध उपक्रम राबविण्यात आले. यामुळे मोठ्याप्रमाणात नवऊद्योजक तयार झाले. त्यामुळे त्यांना विक्रीसाठी व्यासपीठ देण्यासाठी कृषी पणन मंडळामार्फत या महोत्सवाचे आयोजन करण्यात आले. महोत्स्वाचे उद्घाटन पणन मंत्री जयकुमार रावल यांच्या हस्ते झाले. यावेळी पणन मंडळाच्या अधिकारी कर्मचारी यांच्या मिलेट बाईक रॅलीद्वारे पुणे शहरातील प्रमुख मार्गावरून मिलेटबाबतची जन-जागृती करण्यात आली.
महोत्सवामध्ये राज्याच्या विविध भागातून तृणधान्य उत्पादक, प्रक्रियामध्ये कार्यरत असणारे बचत गट, सहकारी संस्था, शेतकरी उत्पादक कंपन्या, नवउद्यमी (स्टार्टअप) कंपन्यांना 50 दालने (स्टॉल) उपलब्ध करून देण्यात आले होते. ग्राहकांना अस्सल मालदांडी – दगडी ज्वारी, बाजरी, नाचणी, भगर, राळा, सामा, कोद्रा ही तृणधान्ये व त्यापासून तयार करण्यात येणारा ज्वारीचा रवा, बाजरीच्या लाह्या, रागीची बिस्किटे, ज्वारीचे इडली – मिक्स, रागीचा डोसा मिक्स, वरईचे दूध, वरईचे श्रीखंड, बाजरीची बर्फी अशी विविध नाविण्यपूर्ण उत्पादनांसोबतच नागपूरची संत्री व त्याचा रस थेट उत्पादकांकडून प्रदर्शन तसेच विक्रीसाठी उपलब्ध करण्यात आला. ज्वारी, बाजरी आणि नाचणीपासून बनविलेल्या 20 प्रकारच्या चवींची आईस्क्रीम हे या महोत्सवाचे आकर्षण ठरले.
महोत्सवामध्ये मिलेट उत्पादन, मूल्यवर्धीत प्रक्रिया उत्पादने, आरोग्यविषयक महत्व या विषयी महात्मा फुले कृषी विद्यापीठ, राहुरी अंतर्गत अखिल भारतीय समन्वयीत नाचणी व तत्सम तृणधान्य संशोधन प्रकल्प, विभागीय कृषी संशोधन केंद्र, कोल्हापूरचे प्रमुख, डॉ. योगेश बन यांचे मार्गदर्शन ठेवण्यात आले होते. त्यास ग्राहकांचा चांगला प्रतिसाद मिळाला.
या महोत्सवात पणन मंडळाचे कार्यकारी संचालक श्री. कदम, सरव्यवस्थापक विनायक कोकरे यांनी महोत्सवातील मिलेट उत्पादकांशी मिलेटच्या विक्रीव्यवस्थेबाबतच्या (मार्केटिंग) अडचणींविषयी चर्चा केली. महोत्सव यशस्वी करण्यासाठी श्री. कदम तसेच श्री. कोकरे यांच्या मार्गदर्शनाखाली देशांतर्गत व्यापार विकास विभागाचे मंगेश कदम, सहाय्यक सरव्यवस्थापक सुहास काळे, सचिन माने, उमाकांत वाघ, साक्षी गायकवाड व आनंद शुक्ल यांनी परीश्रम घेतले.
महोत्सवास विविध क्षेत्रातील साधारणत: 12 ते 15 हजार व्यक्तींनी समक्ष भेट देऊन तृणधान्याची उत्पादने खरेदी केली, अशीही माहिती कृषि पणन मंडळाचे कार्यकारी संचालक श्री. संजय कदम यांनी दिली.
00000
