• वेगाने वाढणाऱ्या बाजारात भांडवली गुंतवणूक
• मेकॅट्रॉनिक प्रणालींसाठी उत्पादन क्षमता विस्तारली
• 2030 पर्यंत सुमारे 300 नवीन रोजगार संधी
रायथाइम-वाइलहाइम / तळेगाव, भारत, 5 मार्च 2025 – मेकॅट्रॉनिक्स क्षेत्रातील अग्रणी मार्क्वार्टने भारतातील उपस्थिती वाढवण्याचा निर्णय घेतला असून, आज तळेगाव (पुणे) येथे नव्या उत्पादन प्रकल्पाचे अधिकृत उद्घाटन करण्यात आले. या नवीन सुविधेसह या कुटुंब व्यवस्थापित कंपनीने आपल्या पूर्वीच्या मुंबईतील उत्पादन केंद्राऐवजी तळेगावमधील केंद्र सुरू केले असून उत्पादन क्षमता मोठ्या प्रमाणात वाढवली आहे. यामुळे बदलत्या बाजारपेठेत टिकून राहण्यासाठी आणि अधिक चांगली कामगिरी करण्यासाठी कंपनीची क्षमता वाढली आहे. या प्रकल्पासाठी इमारत, यंत्रसामग्री आणि उपकरणांमध्ये 180 कोटी रुपयांहून अधिक गुंतवणूक करण्यात आली आहे. भविष्यात, या अत्याधुनिक प्रकल्पातून भारतीय ऑटोमोटिव्ह उद्योगासाठी मेकॅट्रॉनिक सिस्टीम सोल्युशन्सचे उत्पादन करण्यात येणार आहे.
मार्क्वार्ट ग्रुपचे मुख्य कार्यकारी अधिकारी ब्योर्न ट्वेहाउस (Björn Twiehaus) म्हणाले, “भारत ही मार्क्वार्टसाठी मोठ्या संधी असलेली महत्त्वाची बाजारपेठ आहे. येथे आम्ही आघाडीच्या वाहन उत्पादकांसोबत सहकार्य करत काम करत आहोत आणि भारतातील टीमच्या नवकल्पनाशक्ती आणि तांत्रिक कौशल्याचा प्रभावी उपयोग करत आहोत. तळेगाव येथील नवीन प्रकल्पाच्या उद्घाटनासह, आम्ही भारतातील यशस्वी प्रवास पुढे नेत आहोत आणि भविष्यातील वाहतुकीच्या मेकॅट्रॉनिक प्रणालींचा प्रमुख पुरवठादार म्हणून आमची भूमिका अधिक बळकट करत आहोत.”
“मेक इन इंडिया” पुढाकारात योगदान
मार्क्वार्ट इंडियाचे महाव्यवस्थापक विशाल नार्वेकर म्हणाले, “तळेगाव येथील नवीन उत्पादन केंद्राचे उद्घाटन हा मार्क्वार्टसाठी भारतातील एक महत्त्वपूर्ण टप्पा आहे. भारतीय ऑटोमोटिव्ह उद्योगातील ग्राहकांसोबत आमचे दीर्घकालीन आणि भक्कम संबंध आमच्या वाढीसाठी महत्त्वाचे ठरले आहेत. या विस्ताराच्या माध्यमातून, स्थानिक भागीदारांच्या गरजेनुसार जागतिक दर्जाचे मेकॅट्रॉनिक सोल्युशन्स पुरवण्याची आमची वचनबद्धता आम्ही अधिक बळकट करत आहोत. तसेच, ही सुविधा ‘मेक इन इंडिया’उपक्रमासाठी आमचे योगदान अधोरेखित करते, कारण यामुळे स्थानिक उत्पादन वाढेल, नवकल्पनांना चालना मिळेल आणि नवीन रोजगार संधी उपलब्ध होतील.”
सुमारे 300 नवीन रोजगार संधी
अत्याधुनिक असेंब्ली लाईन्स, इन-हाऊस इलेक्ट्रॉनिक्स उत्पादन आणि प्रभावी लॉजिस्टिक्स सुविधांच्या माध्यमातून, मार्क्वार्ट तळेगाव येथून ग्राहकांसाठी संपूर्ण मेकॅट्रॉनिक सोल्युशन्स पुरवते. यामध्ये ड्राइव्ह ऑथरायझेशन सिस्टिम, गियर सिलेक्टर स्विच आणि इलेक्ट्रिक वाहनांसाठी बॅटरी मॅनेजमेंट सिस्टिम यांचा समावेश आहे. तसेच, या गुंतवणुकीमुळे पुरवठा साखळी अधिक सुटसुटीत झाली असून, प्रतिसादाचा वेग वाढला आहे आणि उत्पादन प्रक्रिया अधिक लवचिक झाली आहे. पुढील पाच वर्षांत, मार्क्वार्ट या नवीन प्रकल्पामध्ये सुमारे 300 अतिरिक्त रोजगार संधी उपलब्ध करणार आहे.
भारतातील दीर्घकालीन वचनबद्धता
मार्क्वार्ट गेल्या अनेक दशकांपासून भारतात कार्यरत असून, पुण्यातील विकास केंद्रात 450 हून अधिक कर्मचारी कार्यरत आहेत. येथे स्थानिक तसेच आंतरराष्ट्रीय प्रकल्पांवर तज्ज्ञ काम करतात आणि ते जागतिक मार्क्वार्ट इनोव्हेशन नेटवर्कचा भाग आहेत.
“आमची भारतातील टीम ही आमच्या जागतिक यशाचा भक्कम आधारस्तंभ आहे,” असे मार्क्वार्टमधील शेअरहोल्डर आणि संचालक मंडळाचे सदस्य डॉ. हॅराल्ड मार्क्वार्ट यांनी स्पष्ट केले. “भारतीय तज्ज्ञांची उच्च नवकल्पनाशक्ती, कार्यक्षमता आणि समर्पण अनुकरणीय आहे. या नवीन उत्पादन केंद्राच्या माध्यमातून, भारतातील तसेच जागतिक ग्राहकांप्रती आमची दीर्घकालीन वचनबद्धता अधोरेखित केली जात आहे.”
उच्च पदस्थ मान्यवरांच्या उपस्थितीत उद्घाटन समारंभ
या उद्घाटन सोहळ्यास आघाडीच्या वाहन उत्पादक कंपन्यांचे प्रतिनिधी, भागीदार कंपन्या तसेच उद्योग आणि राजकारणातील उच्च पदस्थ व्यक्ती उपस्थित होत्या. या प्रकल्पात योगदान दिलेल्या टीमच्या मेहनतीचे डॉ. हॅराल्ड मार्क्वार्ट यांनी या प्रसंगी कौतुक केले. ते म्हणाले, “आज आपण हे उत्पादन केंद्र सुरू करू शकत आहोत, यामागे अनेक समर्पित व्यक्तींचे अथक प्रयत्न आणि चिकाटी आहे. या यशात योगदान दिलेल्या सर्वांना मी मनःपूर्वक धन्यवाद देतो.”
