कोकण विभागीय माहिती कार्यालयाला मिळाले नवे उपसंचालक* *संजू उत्तम चव्हाण यांनी स्वीकारला कोकण विभागीय उपसंचालक (माहिती) पदाचा कार्यभार*

नवी मुंबई दि.14 (विमाका):- माहिती व जनसंपर्क महासंचालनालयाच्या कोकण विभागीय उपसंचालक (माहिती) या रिक्त पदावर सरळ सेवेने नवनियुक्त झालेले संजू उत्तम चव्हाण यांनी आज आपल्या पदाचा कार्यभार अधिकृतपणे स्वीकारला आहे. नवी मुंबईतील सीबीडी बेलापूर येथील कोकण भवनमधील विभागीय माहिती कार्यालयातील उपसंचालकांच्या दालनात एका छोटेखानी आणि उत्साही कार्यक्रमात हा पदभार सोहळा संपन्न झाला. आतापर्यंत या रिक्त पदाचा अतिरिक्त कार्यभार ठाणे जिल्ह्याचे जिल्हा माहिती अधिकारी मनोज सानप यांच्याकडे होता. त्यांनी अत्यंत यशस्वीपणे ही जबाबदारी सांभाळत आज नवनियुक्त उपसंचालक श्री. चव्हाण यांच्याकडे या पदाची अधिकृत सूत्रे सुपूर्द केली आणि त्यांचे मनःपूर्वक स्वागत केले.
या सोहळ्याप्रसंगी ठाणे जिल्हा माहिती अधिकारी मनोज सानप यांच्यासह विभागीय माहिती कार्यालयातील सर्व अधिकारी आणि कर्मचारी उपस्थित होते. याशिवाय कोकण विभागांतर्गत येणाऱ्या ठाणे, रायगड, पालघर आणि रत्नागिरी येथील जिल्हा माहिती कार्यालयातील सर्व अधिकारी व कर्मचाऱ्यांनी डिजिटल माध्यमातून म्हणजेच दूरदृश्य प्रणालीद्वारे (व्हिडिओ कॉन्फरन्सिंग) या कार्यक्रमाला हजेरी लावली होती.
नवनियुक्त उपसंचालक श्री. चव्हाण यांना पत्रकारिता, माध्यम आणि जनसंपर्क क्षेत्रातील तब्बल १३ वर्षांचा प्रदीर्घ अनुभव आहे. त्यांनी यापूर्वी दैनिक ‘सकाळ’ (पुणे आणि मुंबई), दैनिक ‘पुण्यनगरी’ (पुणे) आणि दैनिक ‘नवभारत’ (पुणे) या नामांकित वृत्तपत्रांमध्ये विविध पदांवर यशस्वीपणे काम केले आहे. श्री. चव्हाण यांनी जर्नालिझम आणि मास कम्युनिकेशन (पत्रकारिता व जनसंवाद) या विषयात पदव्युत्तर पदवी (Post Graduation) संपादन केली असून, सध्या ते ‘जनसंपर्क’ (Communication) या विषयात पीएचडी (PhD) करत आहेत.
नूतन उपसंचालक श्री. संजू चव्हाण यांनी पदभार स्वीकारल्यानंतर उपस्थितांचे आभार मानले आणि कोकण विभागातील शासकीय योजनांचा प्रचार अन् प्रसार अधिक प्रभावीपणे करण्यासाठी सर्व अधिकारी व कर्मचाऱ्यांच्या सहकार्याने काम करण्याचा संकल्प व्यक्त केला. या पदभार हस्तांतरण कार्यक्रमानंतर उपस्थित सर्व अधिकारी, कर्मचारी आणि माध्यम प्रतिनिधींनी श्री. चव्हाण यांना त्यांच्या भावी यशस्वी कार्यकाळासाठी शुभेच्छा दिल्या. *****