रक्तदान शिबिरासह विविध कला व क्रीडा स्पर्धांतून परिचारिकांच्या कौशल्यांचा गौरव
“आमच्या परिचारिका आपले भविष्य: सक्षम परिचारिका वाचवतात प्राण” या संकल्पनेअंतर्गत परिचारिकांच्या करुणा, समर्पण आणि सेवेच्या भावनेचा गौरव
पुणे, १५. मे 2026 : डॉ. डी. वाय. पाटील विद्यापीठ (अभिमत विद्यापीठ) अंतर्गत येणाऱ्या डॉ. डी. वाय. पाटील वैद्यकीय महाविद्यालय, रुग्णालय आणि संशोधन केंद्र, पिंपरी, पुणे येथे ‘आंतरराष्ट्रीय परिचारिका दिन २०२६’ उत्साहात साजरा करण्यात आला. यावेळी डॉ. डी. वाय. पाटील विद्यापीठाचे कुलपती मा. डॉ. पी. डी. पाटील, प्र-कुलपती मा. (सौ) डॉ. भाग्यश्री पी. पाटील आणि विश्वस्त व खजिनदार मा. डॉ. यशराज पी. पाटील यांनी या दिनानिमित्त सर्व परिचारिकांच्या कामाचे कौतुक करीत शुभेच्छा दिल्या.
या प्रसंगी प्रमुख पाहुण्या म्हणून प्र-कुलपती मा. (सौ) डॉ. भाग्यश्री पी. पाटील तसेच वैद्यकीय महाविद्यालयाच्या अधिष्ठाता डॉ. ए. रेखा, शैक्षणिक संचालिका डॉ. पी. वत्सलास्वामी आणि रुग्णालयाचे वैद्यकीय अधीक्षक डॉ. एच. एच. चव्हाण यांसह अन्य मान्यवर उपस्थित होते. मुख्य परिचारिका अधिकारी लाजवंती एन. घाडगे आणि परिचारिका विभागाच्या उप संचालिका ( निवृत्त कर्नल) लक्ष्मीप्रिया परिदा यांनीही या सोहळ्याच्या यशस्वी आयोजनासाठी परिश्रम घेतले.
“आमच्या परिचारिका आपले भविष्य: सक्षम परिचारिका वाचवतात प्राण” या संकल्पनेवर आधारित या कार्यक्रमात रुग्णसेवा आणि आरोग्य व्यवस्थेतील परिचारिकांच्या बहुमोल योगदानाचा गौरव करण्यात आला.
“कार्यक्रमाची सुरुवात स्वागतपर भाषणाने झाली; त्यानंतर दीपप्रज्वलन, पाहुण्यांचा सत्कार, परिचारिकांची शपथ, पुस्तक प्रकाशन आणि केक कापण्याचा सोहळा पार पडला. या सोहळ्यात मान्यवरांची भाषणे, सांस्कृतिक कार्यक्रम, पारितोषिक वितरण आणि आभार प्रदर्शन झाले.
या सप्ताहानिमित्त आयोजित विविध उपक्रमांतर्गत रक्तदान शिबिरात १०५ दात्यांनी रक्तदान केले. तसेच भित्तीपत्रक स्पर्धा (Posters), नृत्य, गायन, पथनाट्य, ‘कोण बनेगा ज्ञानपती’ ही प्रश्नमंजुषा, संगीत खुर्ची आणि क्रिकेट अशा विविध स्पर्धांचे आयोजन करण्यात आले होते. यामधील विजेत्यांना मान्यवरांच्या हस्ते गौरविण्यात आले.”
याप्रसंगी डॉ. डी. वाय. पाटील विद्यापीठाच्या प्र-कुलपती मा. (सौ) डॉ. भाग्यश्री पी. पाटील म्हणाल्या की, “परिचारिका या आरोग्यसेवेचा आधारस्तंभ आहेत आणि रुग्णाच्या बरे होण्याच्या प्रवासात त्यांची भूमिका अत्यंत मोलाची आहे. त्यांचे समर्पण, सहानुभूती, चिकाटी आणि निस्वार्थी सेवा दररोज असंख्य कुटुंबांना दिलासा आणि आशा देते. डॉ. डी. वाय. पाटील वैद्यकीय महाविद्यालय आणि रुग्णालयात आम्ही आमच्या परिचारिकांच्या योगदानाची मनापासून आदर करतो. त्यांची ही वचनबद्धता आपली आरोग्य व्यवस्था मजबूत करते आणि मानवतेची खरी भावना जपते. आंतरराष्ट्रीय परिचारिका दिनानिमित्त, आम्ही समाजाप्रती असलेल्या त्यांच्या अतुलनीय सेवेबद्दल कृतज्ञता व्यक्त करतो आणि त्यांना सलाम करतो.”
